VIDEO/ Kina vendos rekord të ri Guinness, 110 robotë humanoidë performojnë në sinkron
110 robotë humanoidë kanë realizuar një performancë të përbashkët vallëzimi në qytetin Jinan, Kinë, duke vendosur një rekord të ri botëror Guinness.
Një spektakël i pazakontë teknologjik është zhvilluar në qytetin Jinan, në provincën Shandong të Kinës, ku 110 robotë humanoidë kanë realizuar një performancë të përbashkët vallëzimi, duke vendosur, sipas kompanisë kineze AgiBot, një rekord të ri botëror Guinness.
Robotët kanë kryer lëvizje të sinkronizuara, kanë ndryshuar formacione dhe kanë demonstruar edhe elemente të artit tradicional kinez tai chi, duke treguar aftësitë e tyre për të koordinuar lëvizjet në grup.
Sipas kompanisë AgiBot, të 110 robotët kanë performuar njëkohësisht, ndërsa aktiviteti është ndjekur edhe nga një përfaqësues i Rekordeve Botërore Guinness, i pranishëm për të vlerësuar demonstrimin.
Zhvilluesit theksojnë se demonstrimi synon të tregojë përparimin e teknologjisë së robotëve humanoidë, veçanërisht në koordinimin e lëvizjeve dhe funksionimin e një numri të madh njësish në të njëjtën kohë.
Sipas planeve të kompanisë, robotë të tillë mund të përdoren në të ardhmen në sektorin e turizmit, në hapësira publike dhe në aktivitete argëtuese, duke ofruar shfaqje dhe ndërveprim me vizitorët.