Kadastra derë më derë në Himarë, Finiq dhe Leskovik, rreth 1500 banesa të evidentuara

Agjencia Shtetërore e Kadastrës vazhdon punën e saj në terren për të evidentuar banesa me probleme në dokumentacion. Në Himarë, Finiq dhe Leskovik, janë evidentuar rreth 1500 banesa, duke përfshirë rreth 1000 banesa në Palasë dhe Ilias të Himarës dhe rreth 250 banesa në Leskovik.

Në Palasë dhe Ilias të Himarës, janë evidentuar rreth 1000 banesa, ndërsa dhjetra dosje janë në fazën përfundimtare të trajtimit. Banorët mund të verifikojnë online dokumentet që u mungojnë.

ASHK ka emetuar ndërkohë 22 vendime përfundimtare, ndërsa 38 banesa janë në fazën e fundit të procedurës, në afishim publik. 55 subjekte duhet të dorëzojnë dokumentet që u mungojnë pranë Drejtorisë Vendore të ASHK-së Vlorë. Emrat e tyre dhe dokumentacioni që duhet të plotësojnë janë publikuar në portalin e ASHK.

Prej kësaj të hëne, puna në zonën e Himarës është zgjeruar edhe në Kallarat, Vranisht, Bolenë, Tërbaç dhe Kuç, për të vijuar evidentimin në terren dhe trajtimin e rasteve sipas dokumentacionit dhe kushteve ligjore.

Grupet e specialistëve të Kadastrës kanë nisur së fundmi punën edhe në Bashkinë Finiq për evidentimin e banesave me probleme në dokumentacion. Pas përfundimit të evidentimit në terren në gjashtë fshatrat e para të Njësisë Administrative Finiq, ku u evidentuan 150 shtëpi, puna ka nisur në 10 fshatra të Njësisë Administrative Aliko.

Paralelisht, grupet e punës vijojnë aktivitetin në Velabisht të Beratit, në Leskovik dhe në fshatin Kus të Kasharit. Në Leskovik janë evidentuar rreth 250 banesa.

Qasja e re derë më derë e Kadastrës vijon aktualisht në 30 fshatra të vendit, me synimin për të evidentuar banesat në terren, për të përshpejtuar procedurat e trajtimit të tyre dhe për të ndihmuar qytetarët në plotësimin e dokumentacionit të nevojshëm.

Përmes kësaj praktike të re pune derë më derë, ASHK synon të shkojë pranë banorëve, të identifikojë nga afër problematikat e pronësisë dhe të lehtësojë plotësimin e dokumentacionit për qytetarët, duke i orientuar ata drejt hapave të nevojshëm për përfundimin e procedurave.

Informimi i drejtpërdrejtë dhe verifikimi në terren mbeten pjesë thelbësore e procesit, në mënyrë që çdo rast të trajtohet mbi bazën e dokumentacionit përkatës dhe në përputhje me kërkesat ligjore.