Strehim social për shtresat më në nevojë: Ligji i ri përparëson familjet me të ardhura të ulëta dhe të rinjtë deri në 29 vjeç

Qeveria ka dorëzuar në kuvend një projektligj për strehimin social, i cili përfshin kategoritë përfituese përveç familjeve me të ardhura të ulëta edhe të rinjtë deri në 29 vjeç që janë në pesë vitet e para të karrierës profesionale. Sipas ligjit, në kategorinë student përfshihen personat deri në moshën 29 vjeç, që janë të regjistruar dhe që ndjekin një program studimi në një institucion të arsimit të lartë, publik ose privat. Kusht është fakti se të rinjtë nuk duhet të disponojnë banesë në pronësi në njësinë e vetëqeverisjes vendore ku ndjekin studimet dhe që plotëson kriteret e tjera, të përcaktuara në këtë ligj.

Në draft përfshihet edhe vënia në dispozicion e fondeve të buxhetit për financimin e programeve të veçanta të strehimit, siç është subvencionimi i qirasë. Për studentët pritet që mbështetja financiare të jetë sa gjysma e vlerës për një vlerë qiraje deri në 500 euro. Detajet pritet të përcaktohen më pas me vkm.

Mbështetja për strehimin social synon të shtrihet edhe te familjet njëprindërore me fëmijë, punonjësit e shërbimeve publike dhe profesioneve prioritare, personat me aftësi të kufizuara dhe kujdestarët e tyre, si dhe qytetarët e rikthyer nga emigracioni.

Në draft është rishikuar edhe mënyra e përzgjedhjes së fituesve, e cila do të realizohet sipas një sistemi vlerësimi me 100 pikë. Secili nga katër kriteret e përcaktuara në ligj do të ketë peshën prej 25 pikësh, ndërsa shpërndarja e detajuar e pikëve do të miratohet nga njësitë e vetëqeverisjes vendore.

Bashkitë do të përgatisin listat paraprake të përfituesve dhe do t’ia përcjellin Agjensisë Kombëtare të Strehimit, e cila do të planifikojë zbatimin e programeve duke marrë parasysh numrin e aplikantëve, burimet financiare dhe politike.