Armando Broja me një tjetër dëmtim fizik, ish-trajneri i Burnley-t ngre shqetësimin për sulmuesin e Kombëtares

Armando Broja nuk po gjen qetësi nga dëmtimet. Sulmuesi i Kombëtares shqiptare ka pësuar një tjetër problem fizik gjatë ndeshjes së fundjavës me Burnley-n, duke u detyruar të largohet nga fusha vetëm 13 minuta pas nisjes së takimit. Futbollisti shqiptar e nisi sfidën si titullar, por qëndrimi i tij në fushë zgjati shumë pak, pasi shqetësimet fizike e detyruan të kërkonte zëvendësimin. Sinjalin e alarmit për gjendjen e 25-vjeçarit e dha Nicky Hayen, tashmë i shkarkuar nga posti i trajnerit të Burnley-t, i cili la të kuptohet se dëmtimi mund të jetë serioz.

"Ai ndjeu një kërcitje në zonën e ijëve, kështu që është një tjetër dëmtim. A është serioz? Mendoj se po, por duhet të presim. Ai e ndjeu shumë keq", deklaroi Hayen.

Një tjetër goditje kjo për Brojën, karriera e cilit është kushtëzuar ndjeshëm nga problemet e vazhdueshme fizike. Sulmuesi shqiptar ka kaluar disa periudha të vështira rikuperimi dhe ky dëmtim rrezikon të ndërprerë sërish vazhdimësinë në fushën e lojës.

Situata krijon shqetësim edhe për Kombëtarën shqiptare, në prag të dy përballjeve të fundit dhe vendimtare të Nations League, të programuar për muajin nëntor.

Për momentin, mbetet e paqartë shkalla e dëmtimit dhe koha që do t'i nevojitet Brojës për të u rikthyer në fushë. Gjithçka do të varet nga vlerësimet mjekësore, të cilat pritet të përcaktojnë edhe mundësinë e aktivizimit të tij në ndeshjet e ardhshme të kuqezinjve.