Mbappé trondit garën për Topin e Artë

Kylian Mbappé po fiton terren në garën për Topin e Artë, vetëm pak orë para ceremonisë së ndarjes së çmimit prestigjioz. Sipas të dhënave të kompanisë së basteve Betfair, shanset e sulmuesit francez për ta fituar trofeun janë rritur për 407.8 për qind brenda pak ditësh, duke kaluar nga 4.35 në 22.09 për qind. Kjo rritje e ka ngjitur yllin e Real Madridit në vendin e dytë të favoritëve, përpara Lamine Yamalit, shanset e të cilit kanë rënë në 12.05 për qind. Megjithatë, Harry Kane vazhdon të jetë kandidati kryesor, me 49.10 për qind mundësi për ta fituar çmimin. Lëvizja e fundit ka rikthyer në vëmendje atë që ndodhi në vitin 2024, kur Vinicius Junior konsiderohej favorit për Topin e Artë, por në ditën e ceremonisë u raportua se fitues do të shpallej Rodri. Real Madridi, pasi mësoi se braziliani nuk do ta fitonte çmimin, anuloi udhëtimin drejt Parisit, ndërsa mesfushori spanjoll përfundimisht e ngriti trofeun. Ky precedent ka nxitur spekulimet për një kthesë të mundsheme edhe këtë vit, me Mbappén që po rikthehet në qendër të vëmendjes. Megjithatë, rritja e përqindjeve të basteve nuk përbën konfirmim se francezi do të shpallet fitues dhe as dëshmi për rrjedhje të besueshme të informacionit mbi rezultatin. Në anën tjetër, Kane vazhdon të mbetet favoriti kryesor. Kandidatura e anglezit mbështetet në paraqitjet individuale dhe sukseset me Bayern Munichun, me të cilin fitoi Bundesligën dhe Kupën e Gjermanisë. Sidoqoftë, mungesa e trofeve të mëdhenj evropianë apo ndërkombëtarë mund të ndikojë në vlerësimin e kandidaturës së tij. Gara mbetet e hapur deri në shpalljen zyrtare të fituesit, ndërsa rritja e shanseve të Mbappés ka shtuar paqartësinë në orët e fundit para ceremonisë.