"Grupimi i qytetarëve kallëzon drejtuesit e policisë për dhunën e studentëve"

Një grup intelektualësh dhe juristesh doli në mbështetje të studentëve që prej dy javësh protestojnë në Tiranë dhe qytete të tjera. Grupimi dënoi dhunën policore dhe kërkoi që SPAK të hetojë të gjithë zinxhirin komandues të Policisë shtetërore. Në një deklaratë për mediat, Olsi Nika, drejtues i "Eco Albania", cilësoi dhunën ndaj studentëve si disproporcionale dhe terrorizuese. "Jemi këtu për t'i dhënë një solidaritet të fuqishëm studentëve që të vazhdojnë të ngrenë zërin, të kërkojnë të drejtat e tyre, sepse nuk janë të vetëm", deklaroi Nika. Sipas tij, dhuna nuk ka qenë rastësore: "Absolutisht nuk flasim këtu për elementët e shkëputur të represionit apo të dhunës, flasim këtu për një represion të mirëstrukturuar dhe mirëorganizuar." Më 23 tetor, Qendra Res Publica, së bashku me organizata të shoqërisë civile, avokatë, studentë dhe qytetarë, depozitoi në Prokurorinë e Posaçme (SPAK) një kallëzim penal ndaj drejtorit të Përgjithshëm të Policisë shtetërore, Skënder Hita, dhe drejtuesve të tjerë policorë. Kallëzuesit kërkojnë të hetohet edhe roli i kryeministrit Edi Rama dhe i ministrit të Punëve të Brendshme, Ervin Demo, për orientimet dhe komunikimet me drejtuesit e policisë. Ata duan të dihet gjithashtu nëse të dy kanë ndihmuar në krijimin, mbështetjen ose lejimin e asaj që e quajnë mekanizëm për shtypjen e protestës. Sipas kallëzuesve, materiali i dorëzuar përmban mbi 180 episode të paligjshmërisë të dokumentuara gjatë protestave. Mes tyre janë dhuna ndaj protestuesve paqësorë dhe ndaj personave të neutralizuar, ndërhyrja e efektivëve të maskuar pa shenja identifikimi dhe veprimet e personave civilë të paidentifikuar në prani të policisë ose në bashkëveprim me të. Avokatja Irena Dule, nga Qendra Res Publica, tha se avokatët që po dokumentojnë rastet kanë identifikuar paraprakisht rreth 200 të mitur ndaj të cilëve raportohen masa sigurie. "Ne jemi një grup avokatësh që merremi me dokumentimin e tyre dhe kaq po na rezultojnë në këtë moment, do të konfirmohen rrugës gjithsesi. Por numri është i madh", u shpreh Dule. Sipas saj, nisma për t'u dhënë protestuesve asistencë ligjore u zgjerua kur avokatët panë se rastet nuk ishin të izoluara. Dule ngriti edhe shqetësimin se asnjë efektiv policie nuk është ndëshkuar, edhe pse disa janë filmuar duke ushtruar dhunë. "Unë akoma pres që të ketë një masë sigurie për ndonjë nga efektivët e policisë, që në mënyrë flagrante është parë dhe shihet në rrugë sot duke ushtruar dhunë dukshëm", deklaroi ajo. Aktivistja Rezarta Caushaj tha se një grup vullnetarësh po punon me juristët për të ruajtur pamjet nga protestat si prova për procese të mundshme ligjore. "Dokumentojmë dhe arkivojmë të gjitha pamjet, të cilat edhe mund të zhduken, sepse ne e kemi nga eksperienca", u shpreh Caushaj. Sipas saj, përveç kallëzimit ndaj drejtuesve të policisë dhe kallëzimeve individuale që kanë nisur, do të ketë edhe të tjera. Caushaj theksoi se urdhrat verbalë nuk justifikojnë veprimet e paligjshme. Nika u bëri thirrje efektivëve të policisë të mos zbatojnë urdhra që bien ndesh me ligjin. Grupimi kundërshtoi edhe paketën antidhunë të propozuar nga kryeministri Rama, e cila parashikon një sërë masash intimituese që mund të cenojnë lirinë e tubimit. "Kjo paketë, në gjykimin tonë, është në vazhdën e gjithë përpjekjeve për të imponuar heshtjen dhe për të dekurajuar, për të delegjitimuar protestën dhe protestuesit", tha Nika. Ai paralajmëroi se grupimi mund ta kundërshtojë paketën edhe përmes rrugëve institucionale. Lorenco Sina, i sapodiplomuar në Fakultetin e Drejtësisë tha se paketa nuk do t'i tërheqë protestuesit nga rruga. "Ne gjatë ditës hamë gaz, gjatë natës punojmë", u shpreh ai. Ai shtoi se qeveria gabon nëse i konsideron protestuesit thjesht huliganë. "Në qoftë se mendon që ne jemi thjesht disa huliganë, e ka shumë gabim, nuk duhet të na nënvlerësojë. Nëse na nënvlerëson, do jemi ne pikërisht arsyeja se pse ai do bjerë", u shpreh Sina. Grupimi i bëri thirrje SPAK-ut të hetojë me paanshmëri dhe shpejtësi pretendimet e ngritura në kallëzim, ndërsa shprehu mbështetjen për vijimin e protestave dhe kërkesave të studentëve.