Të rinjtë shqiptarë, të fundit në Evropë për të ardhurat sipas fuqisë blerëse

Të rinjtë shqiptarë janë në fund të renditjes evropiane për të ardhurat sipas fuqisë blerëse, me një nivel i ulët i 5,736 euro për familjet e tyre. Kjo është një nga shqetësimet që kanë ngritur protestat e tyre në Shqipëri dhe në disa vende evropiane.

Sipas Eurostat, të ardhurat mediane vjetore të disponueshme për familjet e të rinjve të moshës 18-24 vjeç në Shqipëri arrijnë vetëm 5,736 euro, duke u renditur në vendin e 34-të në Evropë. Vetëm Maqedonia e Veriut renditet më poshtë, me 4,640 euro, ndërsa mesatarja e Bashkimit Evropian është 21,482 euro.

Kjo analiza vjen në një kohë kur protestat e të rinjve janë përhapur në disa vende evropiane, veçanërisht në Francë, të nxitura nga rritja e kostos së jetës, vështirësitë për të siguruar banesë, pagat e ulëta dhe problemet me shërbimet publike.

Edhe Shqipëria është përfshirë në javët e fundit nga protestat e studentëve dhe të rinjve, të cilët kanë ngritur shqetësimet për kushtet e arsimit, mungesën e vendeve të punës, koston e jetës dhe korrupsionin. Një pjesë e protestave janë shndërruar në demonstrata më të gjera kundër qeverisë.

Këto zhvillime bëjnë edhe më domethënëse krahasimin e të ardhurave të të rinjve shqiptarë me ato të bashkëmoshatarëve evropianë.

Sipas Euronews, protestat e fundit në Evropë kanë rikthyer vëmendjen tek gjendja ekonomike e brezit të ri. Eksperti i së drejtës europiane Alberto Alemanno thekson se protestat nuk mund të trajtohen thjesht si një revoltë e adoleshentëve, pasi ato përfshijnë shqetësimet dhe kërkesat ekonomike dhe shoqërore.

Shqipëria dhe Maqedonia e Veriut janë në fund të renditjes, me 5,736 dhe 4,640 euro në vit, ndërsa Zvicra kryeson renditjen evropiane me 52,206 euro për familjet e të rinjve 18-24 vjeç.