Pacolli: Nuk kam humbur shpresën te drejtësia shqiptare, do vazhdoj bashkëpunimin me SPAK
Behgjet Pacolli ka reaguar pas daljes nga Prokuroria e Posaçme, duke theksuar se vazhdon të besojë në drejtësinë shqiptare dhe se pret që institucionet të veprojnë në mënyrë të pavarur.
Pacolli ka deklaruar se ka paraqitur dokumente, fakte dhe rrethana për shkeljet që janë kryer në lidhje me pronën dhe administrimin e Aeroportit Ndërkombëtar të Vlorës në Prokurori të Posaçme.
"Sot pata mundësinë të paraqitesha për rreth 7 orë para Prokurorisë së Posaçme kundër Korrupsionit dhe Krimit të Organizuar (SPAK), ku paraqita në mënyrë të detajuar faktet, dokumentet dhe rrethanat e asaj që ka ndodhur dhe po ndodh me Aeroportin Ndërkombëtar të Vlorës.
E vlerësoj këtë mundësi dhe jam i kënaqur që mundem të sjellim para organit kompetent të vërtetët e plotë mbi ndërhyrjet e paligjshme në strukturën e pronësisë, shpërfilljen e vendimeve gjyqësore dhe cenimin e pronësisë private", tha Pacolli.
Reagimi i tij vjen në kulmin e përplasjes për kontrollin e shoqërisë koncesionare Vlora International Airport (VIA), pas ndryshimeve të regjistruara më 19 tetor në Qendrën Kombëtare të Biznesit.
Sipas të dhënave të bërë publike, pjesëmarrja e kompanisë 2A Group në strukturën e aksioneve ka kaluar nga 2% në 40%, ndërsa ajo e kompanisë MABCO Constructions, të lidhur me Pacollin, ka zbritur nga 98% në 51%.
Dy ditë më parë, biznesmeni njoftoi se kishte depozituar kallëzim penal ndaj QKB-së, duke pretenduar se ndryshimet janë kryer në kundërshtim me vendimet gjyqësore dhe masat e sigurimit që, sipas tij, pengonin transferimin e kuotave.
Pacolli ka ngritur dyshime edhe ndaj administratorit të aeroportit, Vegim Hoxha, dhe Valon Ademit, të lidhur me kompaninë 2A Group, lidhur me veprimet që çuan në ndryshimin e strukturës së pronësisë. Këto pretendime mbeten për t'u verifikuar nga organet kompetente.
Në reagimin e tij pas daljes nga SPAK, Pacolli thekson se vazhdon të besojë në drejtësinë shqiptare dhe se pret që institucionet të veprojnë në mënyrë të pavarur.
"Nuk e kam humbur shpresën se në Shqipëri po bëhet drejtësi. Besoj se institucionet e drejtësisë do të veprojnë në mënyrë të pavarur dhe do të garantojnë respektimin e ligjit.
Ne do të vazhdojmë të bashkëpunim plotësisht me SPAK dhe me çdo institucion kompetent, deri në sqarimin e plotë të së vërtetës dhe mbrojtjen e të drejtave tona ligjore.
Askush nuk është mbi ligjin. Prona private dhe vendimet e gjykatave duhet të respektohen", përfundon Pacolli.