Presidenti iranian në Moskë për samitin e vendeve eksportuese të gazit

Presidenti iranian Masud Pezeshkian ka mbërritur në Moskë për të marrë pjesë në samitin e vendeve eksportuese të gazit, sipas agjencisë ruse të lajmeve Interfax. Samiti i tetë i Forumit të Vendeve Eksportuese të Gazit (GECF) do të mbledhë udhëheqës dhe përfaqësues të vendeve eksportuese të gazit natyror.

Presidenti rus Vladimir Putin ka planifikuar të zhvillojë takime të veçanta me presidentin iranian dhe emirin e Katarit, Sheikh Tamim bin Hamad al-Thani, në kuadrin e forumit. Në margjina të samitit, Putin ka planifikuar pesë takime dypalëshe me udhëheqës të huaj, duke përfshirë presidentin e Mozambikut, Daniel Chapo, presidentin e Guineas Ekvatoriale, Teodoro Obiang Nguema Mbasogo, dhe kryetarin e Keshillit Presidencial të Libisë, Mohamed al-Menfi.

Takimet do të zhvillohen në kuadrin e një forumi ndërkombëtar që bashkon vende me rol të rëndësishëm në prodhimin dhe eksportin e gazit natyror. Sipas Kremlinit, në fjalimin e tij në samitin e 27 tetorit, Putin do të trajtojë sfidat gjeopolitike që përballet industria e gazit dhe rëndësinë e këtij burimi energjetik për rritjen ekonomike.

Në përfundim të forumit, pjesëmarrësit pritet të miratojnë Deklaratën e Moskës, e cila do të përqendrohet në sigurinë energjetike, bashkëpunimin ndërmjet vendeve eksportuese dhe qëndrueshmërinë e tregjeve ndërkombëtare të gazit.