Spektakël shqiptan në Turqi: Muçi dhe Laçi në një ndeshje të jashtëzakonshme

Një përmbysje spektakolare me protagonistë dy futbollistët e Kombëtares shqiptare. Ernest Muçi ishte arkitekti i triumfit të Trabzonsporit me tri asiste, ndërsa Qazim Laçi realizoi një gol të bukur nga distanca për Rizesporin.

TURQI - Një duel i jashtëzakonshëm mes dy shqiptarëve në kampionatin turk, ku Trabzonspori triumfoi 4-3 kundër Rizesporit, pas një ndeshjeje me shtatë gola dhe një përmbysje të madhe. Në qendër të vëmendjes ishin Ernest Muçi dhe Qazim Laçi, të cilët lanë gjurmën e tyre në këtë spektakël.

Rizespori e mbylli pjesën e parë në avantazhin e dy golave, falë dygolëshit të Gennaro Borrellit në minutat 12 dhe 32. Por pas pushimit, Trabzonspori reagoi fuqishëm dhe përmbysi gjithçka brenda pak minutash.

Melih Kabasakal ngushtoi diferencën në minutën e 49-të, ndërsa vetëm dy minuta më vonë Aral Şimşir barazoi shifrat. Në të dy golat, asistet mbanin firmën e Ernest Muçit, i cili vazhdoi të ishte vendimtar edhe në përmbysjen e miqve. Në minutën e 57-të, Franculino shënoin golin e tretë për Trabzonsporin, pas një aksioni ku Muçi ishte sërish protagonist me goditjen e tij drejt portës.

Por përgjigja e Rizesporit erdhi nga këmbët e një tjetër shqiptari. Në minutën e 68-të, Qazim Laçi lëshoi një goditje spektakolare nga distanca, duke mposhtur portierin André Onana dhe duke barazuar rezultatin në 3-3.

Kur ndeshja dukej se mund të përfundonte në barazim, dyshja Muçi-Franculino goditi sërish. Në minutën e 83-të, sulmuesi nga Danimarka shënoin golin e fitores, pas asistit të tretë të mbrëmjes nga Ernest Muçi, duke vulosur rezultatin 4-3 për Trabzonsporin.

Kështu, Muçi u kthye në protagonistin kryesor të përmbysjes, ndërsa Laçi konfirmoi formën e mirë me një gol që meriton vëmendje të veçantë. Një mbrëmje pozitive për futbollin shqiptar, edhe pse dy lojtarët e Kombëtares ishin në krahë të kundërt.