Ekonomia shqiptare pritet të rritet 3.4% në vitin 2026, sipas Bankës Botërore

Ekonomia shqiptare pritet të rritet 3.4% në vitin 2026, sipas raportit të Bankës Botërore për Ballkanin Perëndimor. Raporti vlerëson se papunësia në Shqipëri ka zbritur në nivelin më të ulët historik, ndërsa pagat vijojnë të rriten.

Në nivel rajonal, rritja ekonomike parashikohet mesatarisht në 3.1% për vitin 2026. Megjithatë, Shqipëria renditet pas Kosovës, me 3.6%, por përpara Maqedonisë së Veriut me 3.3%, Malit të Zi me 3.2%, Serbisë me 3.1% dhe Bosnjë-Hercegovinës me 2.4%.

Banka Botërore thekson se lehtësimi i barrierave tregtare dhe procedurave administrative mund të nxisë investimet, eksportet dhe punësimin. Sidoqoftë, vetëm qëndrueshmëria nuk mjafton që rajoni të afrohet me nivelet mesatare të të ardhurave në Bashkimin Evropian apo të krijojë vendet cilësore të punës për të cilat ka nevojë.

Në treguesit fiskalë, Banka Botërore evidenton se borxhi publik ka zbritur nën 50% të Prodhimit të Brendshëm Bruto, ndërsa bilanci buxhetor dhe pozicioni i jashtëm i vendit janë përmirësuar.