"Kosh Film Fest" sjell risi në edicionin e 13-të

Korça është duke mirëpritur edicionin e 13-të të festivalit ndërkombëtar të filmit me metrazh të shkurtër "Kosh Film Fest", i cili këtë vit vjen me rishikim në program, kompeticione të reja dhe numër më i lartë i filmave të prezantuar deri më tani. Rreth 100 produksione nga vende të ndryshme të botës do të shfaqen për publikun, duke sjellë histori, këndvështrime dhe mesazhe që prekin çështje të aktualitetit.

Një nga risitë e këtij edicioni është përfshirja e filmave të gjeneruar nga inteligjenca artificiale, rikthimi i filmave në formatin VR, si dhe zgjerimi i programeve të dedikuara për fëmijët. Përtej risive teknologjike dhe zgjerimit të programit, një pjesë e rëndësishme e filmave në konkurrim trajton marrëdhënien e njeriut me natyrën dhe pasojat e dëmtimit të mjedisit.

Sipas drejtorit të festivalit, këto problematika shfaqen në produksione të ardhura nga vende të ndryshme të Bashkimit Evropian dhe të botës, duke parëllëlluar mesazhe që lidhen edhe me realitetin shqiptar.

"Filmat e shkurtër që janë në konkurrim, si gjithmonë ne nuk kemi një temë specifike, por kemi vënë re që shumë filma të ardhur këtë vit kanë të bëjnë me natyrën, shkatërrimin që njeriu i bën natyrës dhe janë në shumë vende të ndryshme të Bashkimit Evropian dhe të botës, të cilët i kanë temat që janë dhe aktuale në Shqipëri, por dhe jo vetëm këtu. Këtë vit ne vendosëm për herë të pare ta nisim festivalin me një film të gjatë, nuk ka ndodhur ndonjëherë, dhe e kemi vendosur pasi ky është filmi i përshtatshëm për shkak të temës që ne kemi këtë vit, i cili ka të bëjë me mos-harresëm, domethënë moskthimin e kokës menjanë kur kemi një problem përballë, të cilin mund të jesh shumë i gjerë si tema", tha Gledis Bica, drejtor i festivalit.

Filmat dhe temat e trajtuar në festival kanë tërhequr edhe vëmendjen e vizitorëve të huaj. Anna Shnaidman, e ardhur nga Izraeli, e vlerësoi filmin e ndjekur si një përvojë të veçantë, duke vëzhgjur thellësinë e historisë, këndvështrimin e regjisorit dhe interpretimin e aktorëve.

Ajo vlerësoi mundësinë për të njohur një format që, sipas saj, sjell në ekran produksione unike nga vende të ndryshme të botës, të cilat nuk gjenden lehtësisht në kinematë e zakonshme.

"Po, nuk e prisja këtë, është hera ime e pare në këtë kinema këtu. Dhe filmi ishte i mrekullueshëm, shumë i thellë, me një perspektivë dhe këndvështrim shumë unik. Mendoj se ishte punuar bukur, si nga perspektiva e regjisorit, ashtu edhe nga aktorët, e sigurisht edhe nga mesazhi. Kështu që e shijova shumë. Për filma të shkurtër, po (është hera e pare). Mendoj se para rreth 10 vitesh kam qenë në një festival filmi në Izrael, ku gjithashtu kishte filma unike nga e gjithë bota që zakonisht nuk i sheh në kinematë e vendeve të tjera. Por kjo ishte shumë kohë më pare dhe gjithashtu ishin filma me metrazh të gjatë. Në fakt nuk isha e njohur me këtë lloj formati të filmave të shkurtër dhe, po, u surprizova", tha Shnaidman.

Me programe që ndërthurin kinemanë tradicionale me teknologjinë e re dhe me fokus te temat sociale e mjedisore, edicioni i 13-të i "Kosh Film Fest" synon të sjellë për publikun histori dhe perspektiva të ndryshme, duke e kthyer Korçën në një pikë takimi për krijimtarinë filmike ndërkombëtare.