Tatimi mbi pagat mbi 700 mijë lekë do të rritet në 32%

Paketa e re fiskale parashikon vendosjen e një shkalle të tretë tatimore për pagat e larta, ndërsa për pagat nga 200 mijë deri në 700 mijë lekë parashikohet lehtësim i barrës tatimore.

Sipas propozimit, për herë të parë do të vendoset një normë marxhinale tatimore prej 32% për pagat bruto mbi 700 mijë lekë në muaj, që korrespondon me një bazë tatimore vjetore mbi 8,040,000 lekë, pas aplikimit të zbritjes tatimore.

Norma e re prej 32% do të zbatohet vetëm mbi pjesën e të ardhurave që tejkalon pragun e percaktuar dhe jo mbi të gjithë pagën. Aktualisht, të ardhurat mbi kufirin e fashes së pare tatohen me normën 23%, pa një shkallë të tretë për pagat më të larta.

Ndërkohë, për pagat më të ulëta se 700 mijë lekë parashikohet lehtësim i tatimit, përmes rritjes së kufirit të fashes së pare tatimore. Aktualisht, norma 23% zbatohet mbi pjesën e pagës bruto që tejkalon 200 mijë lekë në muaj. Me ndryshimet e propozuara, ky prag do të rritet në 300 mijë lekë, duke zgjeruar fashën e të ardhurave që tatohen me normën 13%.

Për pagat bruto nga 300,001 deri në 700,000 lekë në muaj, norma marxhinale e tatimit do të jetë 23%. Sipas relacionit, kjo ndërrhyrje synon lehtësimin e barrës tatimore për shtresën e mesme dhe profesionistët e kualifikuar, ndërsa individët me të ardhura më të larta do të nenshtrohen një norme më të lartë tatimore.

Me formulën e re, tatimi progresiv mbi të ardhurat nga punësimi do të ketë tri shkalla, të percaktuar sipas bazës tatimore vjetore: kufijtë e mesipërm i referohen bazës tatimore vjetore pas zbritjes tatimore të parashikuar në ligj, ndërsa pragjet mujore prej 300 mijë dhe 700 mijë lekësh i referohen pagës bruto.

Propozimet janë pjesë e paketës së re fiskale dhe duhet të miratohen përpara se të hyjnë në fuqi.