Skandal fiskal në Greqi: 135 milionë euro humbje në zinxhirin e picerive dhe furrave të bukës

Greqia është në mes të një skandalit të madh fiskal, pasi dy zinxhira të medhenj të sektorit ushqimor janë në qendër të hetimeve për mashtrim fiskal. Autoritetet kanë arrestuar mbi 80 persona dhe kanë ngrirë pasuritë e lidhura me skemat e dyshuara.

Hetimet që përfshin zinxhirin e picerive Pizza Fan dhe zinxhirin e furrave të bukës To Choriatiko kanë zbuluar mekanizma të dyshuar për fshehjen e shitjeve, shmangien e taksave dhe mospagimin e kontributeve të sigurimeve shoqërore përgjatë disa viteve. Sipas autoriteteve greke dhe raportimeve të mediave, humbjet e vlerësuara të të ardhurave publike tejkalojnë 35 milionë euro në rastin e Pizza Fan dhe 100 milionë euro në rastin e To Choriatiko.

Hetimi ndaj Pizza Fan përfshin aktivitetin gjatë periudhës 2016-2026. Autoritetet vlerësojnë se më shumë se 150 milionë euro të ardhura të tatueshme janë fshehur përmes një sistemi porositjesh që dyshohet se ishte manipuluar. Hetuesit besojnë se disa porosi të paguara regjistroheshin në mënyrë elektronike si produkte falas, duke mundësuar përfundimin e transaksioneve pa lëshuar kuponët e detyrueshëm fiskalë.

Policia hetoi gjithashtu raportimet se para të padeklaruara mblidheshin nga pikat e shitjes gjatë takimeve mujore. Kontrollat çuan në sekuestrimin e rreth 1.29 milionë eurove në para fizike, përfshirë 1.1 milionë euro, që sipas raportimeve, u gjetën në një ndarje të fshehtë në banesën e organizatorit të dyshuar. Autoritetet konfiskuan gjithashtu kompjuterë, automjete luksoze, motoçikleta dhe 92 orë të shtrenjta dhe bizhuteri.

Përfaqësuesit e kompanisë kanë kundërshtuar akuzat, duke argumentuar se ofertat e ligjshme promocionale, që përfshinin produkte falas, mund të jenë interpretuar gabimisht si shitje të fshehura. Pizza Fan ka deklaruar se po bashkëpunon me hetuesit.

Zinxhiri i furrave të bukës është nën hetim për 100 milionë euro, dhe dhjetëra persona janë arrestuar. Hetimi përfshin një rrjet të gjerë kompanish, që dyshohet se përdorej për të grumbulluar detyrime tatimore dhe të sigurimeve shoqërore, përpara se aktiviteti i biznesit të transferohej te kompani të sapokrijuara. Sipas raportimeve më të fundit, hetuesit po shqyrtojnë rreth 520 kompani të lidhura me më shumë se 200 pika shitjeje.

Skema e dyshuar përfshinte vendosjen e administratorëve formalë në drejtimin e kompanive, pa u dhënë atyre kontroll real mbi aktivitetin. Disa prej tyre raportohen se merrnin pagesa mujore prej 500 deri në 700 eurosh. Humbjet e vlerësuara përfshijnë më shumë se 55 milionë euro TVSH të papaguar dhe rreth 45 milionë euro kontribute të papaguara të sigurimeve shoqërore.

Autoritetet po hetojnë gjithashtu rolin e kontabilistëve të përfshirë në krijimin dhe administrimin e kompanive. Më 26 tetor, prokurorët ngritën akuza ndaj 59 personave të arrestuar në kuadër të hetimit për zinxhirin e furrave të bukës, për nëntë vepra penale të rënda dhe dy kundërvajtje penale të dyshuara.

Autoriteti Grek Kundër Pastrimit të Parave urdhëroi ngrirjen e një game të gjerë pasurish në të dyja rastet, duke përfshirë llogari bankare, prona të paluajtshme dhe pasuri të tjera. Llogaritë e përdorura për pagesën e pagave u përjashtuan shprehimisht nga kjo masë, për të mbrojtur pagat e punonjësve.

Hetuesit financiarë po vijojnë shqyrtimin e dokumentacionit të kompanive dhe transaksioneve, për të përcaktuar shumën përfundimtare të detyrimeve ndaj shtetit dhe përgjegjësinë individuale të personave të përfshirë.