Të pandehurit për trafik kokainë dhe marijuanë në katër shtete, çon për gjykim Rexhep Rrajën dhe 15 të tjerë

Prokuroria e Posaçme kundër Korrupsionit dhe Krimit të Organizuar ka përfunduar hetimet dhe ka dërguar për gjykim 17 persona, mes tyre Rexhep Rraja, Endrit Dokle, Perparim Rraja dhe Gazmir Rraja, të akuzuar për përfshirje në trafik ndërkombëtar të lëndëve narkotike dhe veprimtari të grupeve të strukturuar kriminale.

Sipas SPAK, hetimet kanë zbuluar një veprimtari të organizuar të trafikimit të marijuanës dhe kokainës nga Shqipëria dhe Amerika Latine drejt disa vendeve, përfshirë Gjermaninë, Malin e Zi, Turqinë dhe Holandën.

Në qendër të hetimeve janë tre episode të trafikut ndërkombëtar, gjatë të cilave autoritetet e huaja kanë sekuestruar në total 2 tone dhe 433 kilogramë lëndë narkotike, nga të cilat 1,958 kilogramë marijuanë dhe 475 kilogramë kokainë.

Nga hetimet e Prokurorisë së Posaçme ka rezultuar se Emiljan Burba, Rexhep Rraja dhe Ervis Shuli dyshohet se kanë pasur rolin e drejtuesve dhe financuesve të veprimtarisë kriminale.

Për këto arsye, ndaj tyre janë ngritur akuzat për trafikim të lëndëve narkotike në kuadër të grupit të strukturuar kriminal, si dhe për drejtimin e një grupi të strukturuar kriminal.

Ndërkohë, të pandehurit të tjerë, sipas organit të akuzës, kanë pasur role të ndryshme në realizimin e trafikut dhe koordinimin e veprimtarisë së paligjshme.

Nga 1.7 tone marijuanë në Mal të Zi dhe 475 kilogramë kokainë në Holandë, SPAK ka dokumentuar tre episode të trafikut ndërkombëtar të drogës, të zhvilluar gjatë viteve 2020 dhe 2021.

Episodi i parë lidhet me datën 3 nëntor 2020, kur autoritetet malazeze sekuestruan 1,722 kilogramë marijuanë. Sipas hetimeve, droga ishte nisur nga Shqipëria dhe kishte si destinacion përfundimtar Gjermaninë.

Episodi i dyti është regjistruar më 26 janar 2021, kur autoritetet turke sekuestruan rreth 236 kilogramë marijuanë, e cila dyshohet se ishte dërguar nga Shqipëria drejt Turqisë.

Ndërsa episodi i tretë lidhet me një ngarkesë prej 475 kilogramësh kokainë, të sekuestruar më 23 nëntor 2020 në portin e Vlissingenit, në Holandë. Sipas SPAK, kokaina ishte nisur nga Ekuadori.

Këto ngarkesa, sipas Prokurorisë së Posaçme, janë pjesë e veprimtarisë kriminale për të cilën akuzohen të pandehurit.

Një rol të rëndësishëm në zbardhjen e veprimtarisë së dyshuar kriminale kanë pasur komunikimet e zhvilluara përmes platformës së enkriptuar Sky ECC.

Sipas SPAK, të pandehurit dhe bashkëpunëtorët e tyre përdornin këtë aplikacion për t'u koordinuar në organizimin dhe realizimin e aktiviteteve kriminale.

Komunikimet janë administruar nga autoritetet franceze të drejtësisë dhe më pas i janë vënë në dispozicion SPAK-ut përmes mekanizmave të bashkëpunimit juridik ndërkombëtar.

Nga analizimi i tyre, hetuesit kanë rindërtuar, sipas organit të akuzës, mënyrën e organizimit të trafikut, lidhjet mes personave të përfshirë dhe rolet që dyshohet se kanë pasur në veprimtarinë kriminale.

Prokuroria e Posaçme kundër Korrupsionit dhe Krimit të Organizuar përfundoi hetimet dhe ka dërguar në Gjykatën e Posaçme të Shkallës së Pare kërkesën për gjykimin e procedimit penal nr. 9 të vitit 2024, në ngarkim të 17 të pandehurve:

1. Emiljan Burba, Rexhep Rraja dhe Ervis Shuli, të akuzuar për kryerjen e veprave penale: "Trafikim i lëndëve narkotike", kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a/1 dhe 28 pika 4 të Kodit Penal, në lidhje me nenin 334/1 të Kodit Penal, Kryerje e veprave penale nga organizata kriminale ose grup i strukturuar kriminal".

2. Bujar Sefa (alias Xaka, alias Lala), të akuzuar për kryerjen e veprave penale: "Trafikim i lëndëve narkotike", kryer në bashkëpunim në formën e veçantë të bashkëpunimit, atë të grupit të strukturuar kriminal".