Imuniteti i Guvernatorit të Bankës së Shqipërisë: Zaçaj dhe Gjiknuri në konflikt

Zv.guvernatori i Bankës së Shqipërisë, Holta Zaçaj, ka sqaruar se neni 72 i projektligjit për Bankën e Shqipërisë synon të garantojë pavarësinë e institucionit dhe të shmangë presionet e mundshme ndaj tij. Ai tha se në rastet kur vepra penale nuk lidhet me detyrën, si për shembull një aksident rrugor me pasojë vdekjen, arrestimi mund të kryhet.

"Ne në nenin 72 kemi propozuar që arresti i guvernatorit nëse do të kërkohet duhet të verifikohet nëse ka prova të qenësishme dhe nëse vepra penale për të cilat kërkohet arresti ka lidhje me detyrën. Nuk është imunitet por dispozitë garantuese. Arsyeja pse mbrohet guvernatori, nuk mbrohet për shkak të të qenies së tij guvernator, mbrohet për shkak të elementit që të funksionojë i pavarur pa frikën që një ditë një organ i një pushteti tjetër vjen dhe e pengon për një arsye ose për tjetër për të ushtruar detyrën. Nuk mbrohet guvernatori si person. Ne mbrojmë institucionin duke mbrojtur guvernatorin", tha Zaçaj.

Deputeti socialist Damian Gjiknuri kundërshtoi këtë parashikim, duke argumentuar se Guvernatorit po i jepen garanci që nuk i parashikon Kushtetuta. Ai paralajmëroi se një mbrojtje e tillë mund të kufizojë veprimtarinë e drejtësisë.

"Po i japim guvernatori me ligj ca garanci që nuk i ka askush veç presidentit… kjo është e tepërt. Ne pranojmë dështimin e drejtësisë, garancinë ta jep gjykata. Duhet të jetë në nivel kushtetues, por jo t’i jepet garanci që nuk e përcakton norma kushtetuese. Rasti i vetëm që bëhet bypass", tha Gjiknuri.

Edhe kreu i Komisionit të Ligjeve, Ulsi Manja, ngriti shqetësime lidhur me vështirësitë që mund të hasë prokuroria në mbledhjen e provave, nëse kufizohen kontrollet personale apo ato në banesën e Guvernatorit.

"Po në rastet kur kontrolli i banesës dhe kontrolli personal, kufizojmë hetimin? Si do ti gjejë provat prokurori?", u shpreh Manja.