Gjykata në Irak dënon shtatë shtetas francezë për lidhje me ISIS-in

Gjykata në Bagdad dënoi shtatë shtetas francezë për anëtarësim në organizata terroriste ISIS. Gjashtë prej tyre u dënuan me burgim të përjetshëm, ndërsa një i 24 vjeç u dënua me 15 vjet burg. Sipas legjislacionit irakian, burgimi i përjetshëm parashikon mundësinë e lirimit pas 20 vitesh vuajtje të dënimit. Të gjashtë dënuarit u shpallën fajtorë për anëtarësim në ISIS dhe pjesëmarrje në veprimtari që synonte përhapjen e terrorit. Gjykatësi bëri këtë vendim duke marrë parasysh moshën e të pandehurve dhe mundësinë që ata të rindërtojnë jetën në të ardhmen. Sipas raportimeve, njëri prej të dënuarve ishte dërguar në Siri nga nëna e tij, e cila ishte bashkuar me ISIS-in afro një dekadë më parë. Vendimi për të shtatë të pandehurit përbën fazën e parë të një procesi gjyqësor në të cilin janë përfshirë gjithsej 47 shtetas francezë të akuzuar për lidhje me organizata terroriste. Mes të pandehurve është edhe Adrien Guihal, i cili kishte marrë përsipër, në emër të ISIS-it, përgjegjësinë për sulmin terrorist në qytetin francez të Nisës, më 14 korrik 2016, ku humbën jetën 86 persona. Autoritetet irakiane kanë zhvilluar gjatë viteve të fundit procese të shumta gjyqësore ndaj anëtarëve të ISIS-it, përfshirë shtetas të huaj të akuzuar për krime të kryera në Irak dhe Siri. Organizata terroriste zgjeroi kontrollin e saj në pjesë të mëdha të dy vendeve që nga viti 2014, duke kryer vrasje masive dhe akte të tjera dhune. Edhe pas humbjes së territoreve që kontrollonte, çështja e ndjekjes penale të anëtarëve të saj dhe e riatdhesimit të shtetasve të huaj mbetet një sfidë për autoritetet e vendeve të përfshira.