Liderja e opozitës venezueliane rikthehet në atdhe, pritet nga turma mbështetësish

Liderja e opozitës venezueliane dhe fituesja e Çmimit Nobel për Paqen, Maria Corina Machado, është rikthyer në vend pas më shumë se 10 muajsh në mërgim, ku është pritur nga qindra mbështetës që kanë dalë në rrugë me flamuj dhe thirrje për liri. Machado njoftoi rikthimin përmes një postimi në rrjetin social X, duke publikuar pamje nga pritja entuziaste e qytetarëve. Mbështetësit e saj u mblodhën edhe në kryeqytetin Karakas, ku turma njerëzish dolën në rrugë për ta përshëndetur.

Kthimi i saj vjen në një moment të rendësishëm politik për Venezuelën, pas arrestimit të ish-presidentit Nicolás Maduro nga forcat speciale amerikane në janar dhe nisjes së negociatave për tranzicionin politik të vendit. Megjithatë, procesi i mbështetur nga Shtetet e Bashkuara është zhvilluar deri tani pa përfshirjen e drejtpërdrejtë të Machado-s.

Liderja e opozitës ishte larguar drejt Norvegjisë në dhjetor për të marrë Çmimin Nobel për Paqen, që iu akordua për përpjekjet në mbrojtje të të drejtave demokratike në Venezuelë. Pas zgjedhjeve të kontestuara presidenciale të vitit 2024, ajo kishte qëndruar kryesisht e fshehur, ndërsa autoritetet zgjedhore shpallën fitues Maduro-n.

Presidenti amerikan, Donald Trump deklaroi se nuk kishte dijeni për kthimin e saj, por shprehu shpresën që Machado të ishte e sigurt. Ndërkohë, sekretari amerikan i Shtetit, Marco Rubio, theksoi se Uashingtoni pret që të respektohen liritë politike dhe që të gjitha palët të mbështesin negociatat për zgjedhje të lira dhe të ndershme.

Nga ana tjetër, presidentja e përkohshme e Venezuelës, Delcy Rodríguez, e cilësoi rikthimin e Machado-s si një "spektakël", pa dhenë një përgjigje të qartë nëse ajo do të përfshihet në negociatat për pajtimin politik.

Machado ka deklaruar më herët se synon të rikthejë demokracinë në vend dhe ka lënë të hapur mundësinë e kandidimit për president në rast të zhvillimit të zgjedhjeve të reja.

Pavarësisht premtimeve për një tranzicion demokratik, data e zgjedhjeve të ardhshme ende nuk është shpallur. Rikthimi i Machado-s pritet të shtojë presionin politik për përfshirjen e opozitës në procesin që do të përcaktojë të ardhmen e Venezuelës.