Disiplina zbardh listën e ndëshkimeve në futbollin shqiptar

Komisioni i Disiplinës dhe Etikës i Federatës Shqiptare të Futbollit ka publikuar vendimet e radhës për incidentet e regjistruara në ndeshjet e fundit të futbollit shqiptar. Lista e masave ndëshkuese përfshin gjoba për klube, pezullime për zyrtarë dhe masa për shkeljet e rregullave të garës. KF Tirana dhe AF Elbasani janë gjobitur me 50 mijë lekë për sjelljen e tifozëve, të cilët hodhën sende në fushën e lojës. Për Tiranën, ndëshkimi lidhet edhe me përdorimin e mjeteve piroteknike.

Ndërkohë, zyrtari i Skënderbeut, Gentian Lico, është pezulluar për tri ndeshje, pasi hyri në fushën e lojës në mënyrë paautorizuar. Me katër ndeshje pezullim janë dënuar Ermal Beqiri i Korabit dhe Fatjon Xhafa i Sopotit, për sjellje josportive ndaj zyrtarëve të ndeshjes.

Edhe Kukësi është ndëshkuar me gjobë 50 mijë lekë për vonesën në nisjen e ndeshjes, ndërsa masa financiare do të aplikohet në masën 50%, sipas rregullores përkatëse. Komisioni ka marrë vendime edhe për kategoritë e tjera të futbollit shqiptar, duke konfirmuar masat disiplinore ndaj klubeve dhe zyrtarëve për shkeljet e konstatuara gjatë javës së fundit. Vendimet e plota janë publikuar nga FSHF dhe mund të ankohen brenda afatit të përcaktuar në rregulloren disiplinore.