Qeveria franceze shqyrton bllokimin e rrjeteve sociale dhe internetit celular për të parandaluar protestat

Qeveria franceze po shqyrton mundësinë e kufizimit të aksesit në rrjetet sociale dhe internetin celular në disa zona për të parandaluar organizimin e grupeve të dhunshme gjatë protestave të 24 tetorit. Sipas një investigimi të "Politico", Ministria e Brendshme franceze zhvilloi kontakte me operatorët e telekomunikacionit për të shqyrtuar mënyrat e mundshme të kufizimit të komunikimit online.

Një nismë e tillë arriti kulmin kur kryeministri Sebastien Lecornu u kërkoi drejtpërdrejt operatorëve telefonikë të ishin të përgatitur për të bllokuar aksesin në TikTok, Instagram, Snapchat dhe X. Kërkesa u bë publike fillimisht nga media franceze e teknologjisë dhe politikës, Blast.

Sipas burimeve të cituara nga media, autoritetet kishin frikë se dhuna e regjistruar më 17 tetor mund të përsëritej ose të përshkallëzohej gjatë fundjavës pasuese. Megjithatë, më 24 tetor u regjistruan dukshëm më pak incidente.

Gjëja që dëshironin mbi të gjitha ishte të bllokonin kanalet e komunikimit që u mundësojnë grupeve të takohen dhe të organizohen, tha një punonjës i një kompanie telekomunikacioni, i cili foli në kushte anonimiteti.

Megjithatë, një masë e tillë do të prekte edhe protestuesit paqësorë, duke kufizuar mundësinë e tyre për të komunikuar.

Sipas burimeve të cituara, bllokimi i rrjeteve sociale vetëm në një lagje të caktuar nuk është teknikisht i mundur. Ndërsa ndërprerja e internetit celular do të sillte pasoja edhe për shërbime të tjera të rëndësishme, përfshirë pagesat elektronike, sistemet e sigurisë dhe komunikimet emergjente.

Një alternativë më pak drastike që u diskutua ishte çaktivizimi i funksioneve të shfaqjes së vendndodhjes, me synimin për të penguar organizimin e grumbullimeve mes personave që nuk njihen me njëri-tjetrin.

Ndërkohë, në Parlamentin francez po diskutohen masa të tjera për kufizimin e përmbajtjeve në rrjetet sociale, në kuadër të projektligjit të njohur si "Kush e shkakton dëmin, e paguan".

Projektligji synon t’i bëjë financiarisht përgjegjës personat që marrin pjesë me vetëdije në trazira, edhe në rastet kur ata nuk kanë shkaktuar drejtpërdrejt dëme materiale.

Ai parashikon gjithashtu që platformat online të heqin brenda 24 orëve përmbajtjet që nxisin sulme fizike ose seksuale, vjedhje dhe shkatërrim prone, kur ato mund të shkaktojnë një cenim serioz të rendit publik. Përmbajtjet që nxisin kryengritje do të duhej të hiqeshin brenda një ore.

Ligjvënës të tjerë kanë propozuar masa shtesë, përfshirë përdorimin e sistemeve algoritmike të mbikëqyrjes me video për identifikimin e personave që shkaktojnë trazira, si dhe ndëshkimin e platformave online që nuk parandalojnë shitjen e mallrave të vjedhura.

Sipas raportimit të "Politico", plani për bllokimin e rrjeteve sociale nuk u zbatua gjatë protestave të 24 tetorit, kur u regjistruan dukshëm më pak incidente dhune sesa fundjavën e mëparshme.