Lista Studentore: Duhet të punojë në interes të serbëve, jo të SNS-së

Lista Serbe u formua në vitin 2013 me mbështetjen e SNS-së dhe ish-presidentit serb, Aleksandar Vuçiç. Kjo parti nuk ka reaguar pasi Lista Studentore fitoi në zgjedhjet e së dielës. Lista Serbe, që është partia më e madhe e serbëve në Kosovë, ka në Kuvendin e Kosovës nëntë nga dhjetë mandatet e rezervuara për komunitetin serb, teksa një deputet është nga partia Për Liri, Drejtësi dhe Mbijetesë e Nenad Rashiçit.

Kryeministri i Kosovës, Albin Kurti, deri më tani nuk është deklaruar qartë lidhur me fitoren e Listës Studentore apo bashkëpunimin me autoritetet e reja në Serbi. Në mbledhjen e Qeverisë më 28 tetor, ai vetëm konstatoi se, pas zgjedhjeve të së dielës në Serbi, SNS-ja e humbi shumicën parlamentare, teksa Partia Socialiste e Serbisë e Ivica Daçiqit mbeti jashtë Kuvendit.

“Një çerekshekulli pas humbjes së Millosheviçit dhe Sheshelit në fillim të shekullit XXI, humbje pësuan edhe pasardhësit e tyre politikë, Vuçiçi dhe Daçiçi”, tha Kurti. Më herët, Nenad Rashiç, ministër në Qeverinë e Albin Kurtit, i tha Radios Evropa e Lirë se pas fitores së Listës Studentore pret rifillimin e dialogut ndërmjet Beogradit dhe Prishtinës për normalizimin e marrëdhënieve. Ai shprehu pritjen që të dyja palët t’i drejtohen integrimit evropian.

Kosova dhe Serbia zhvillojnë dialogun me ndërmjetësimin e BE-së që nga viti 2011, por kryeministri i Kosovës, Albin Kurti, e kushtëzon vazhdimin e tij në nivelin e lartë politik me ekstradimin nga Serbia të Millan Radoiçiçit, i cili mori përgjegjësinë për sulmin e armatosur në Banjskë të Zveçanit. Lista Studentore ende nuk ka paraqitur një qëndrim të qartë për Banjskën apo Radoiçiçin.

Illija Sërdanoviç, bartësi i listës së kandidatëve të Listës Studentore, tha më 27 tetor në një intervistë për Radion Evropa e Lirë se, si individ, nuk mund të flasë për këtë çështje para formimit të Qeverisë së re në Serbi. “Por, sigurisht, do të përpiqemi që për të gjitha çështjet e tilla të marrim më vonë vendime në përputhje me procedurat ligjore që vlejnë në Republikën e Serbisë”, tha ai. Ai nuk u shpreh as nëse do të bisedojë me kryeministrin e Kosovës, Albin Kurtin, duke shpjeguar se Lista Studentore ende nuk e ka marrë mandatin.

Megjithatë, Sërdanoviçi tha se autoritetet e reja në Serbi do ta vazhdojnë dialogun për Kosovën, si dhe zbatimin e Marrëveshjes së Brukselit për normalizimin e marrëdhënieve ndërmjet Serbisë dhe Kosovës, por në përputhje me Kushtetutën e Serbisë. Kosova shpalli pavarësinë nga Serbia në vitin 2008, por Serbia ende e konsideron atë pjesë të territorit të saj.