Arrestohen dy persona në Greqi për vrasjen e Rexhep Ismailit në Sarandë

Dy persona të shpallur në kërkim për vrasjen e Rexhep Ismailit, 66 vjeç, janë arrestuar në Greqi. Të dy janë ndaluar përkohësisht me qëllim ekstradimin në Shqipëri në kuadër të bashkëpunimit mes policisë shqiptare dhe asaj greke.

Ngjarja e rendë ndodhi më 7 maj 2026 në ambientet e lokalit në pronësi të viktimës. Në prangë kanë rënë një 37-vjeçar, i dyshuar si autor i vrasjes me armë zjarri dhe një 40-vjeçar, i cili dyshohet se ishte i përfshirë në konfliktin që parapriu ngjarjen.

Sipas hetimeve, ngjarja nisi pas një konflikti mes disa personave, fillimisht me sende të forta dhe më pas me përdorimin e armëve të zjarrit. Për 37-vjeçarin rëndojnë akuzat për vrasje me dashje, armëmbajtje pa leje dhe kanosje në bashkëpunim, ndërsa 40-vjeçari akuzohet për moskallëzim krimi, kanosje dhe shkatërrim prone.

Operacioni u zhvillua në kuadër të operacionit policor të koduar "The Wanted". Sipas Policisë së Shtetit, 40-vjeçari u kap në ishullin e Korfuzit, ku dyshohet se qëndronte duke përdorur identitet të rremë.

Policia e Shtetit ka finalizuar si rezultat i bashkëpunimit të ngushtë me homologët grekë, një tjetër fazë të operacionit të koduar "The Wanted". Kapet në Greqi autor i dyshuar i vrasjes së shtetasit R. I., kryer më datën 07.05.2026, në ambientet e lokalit të viktimës, në fshatin Gjashtë, Sarandë.

Kapet në Greqi edhe një shtetas i përfshirë në konfliktin me sende të forta që parapriu vrasjen e 66-vjeçarit. I ndaluar përdorte identitet të rremë, për qendrim në ishullin e Korfuzit.

Si rezultat i koordinimit informativ dhe operacional, ndërmjet homologëve të Drejtorisë së Interpolit dhe Interpol Athinës, gjatë kësaj faze të operacionit të koduar "The Wanted", u arrestuan provizorisht, në Greqi, me qëllim ekstradimin në Shqipëri, shtetasit në kërkim:

-L. T., 37 vjeç, për të cilin Gjykata e Sarandës ka caktuar masën e sigurisë "Arrest në burg", për veprat penale "Vrasje me dashje", "Mbajtja pa leje dhe prodhimi i armëve, armëve shpërthyese dhe i municionit" dhe "Kanosja", kryer në bashkëpunim;

-I. Ç., 40 vjeç, për të cilin Gjykata e Sarandës ka caktuar masën e sigurisë "Arrest në burg", për veprat penale "Moskallëzim i krimit", "Kanosja" dhe "Shkatërrimi i pronës".

Nga hetimet dyshohet se më datën 07.05.2026, 37-vjeçari ka vrarë me armë zjarri (pistoletë), shtetasin R. I., 66 vjeç, në ambientet e lokalit të këtij të fundit, pas një konflikti me sende të forta, ndërmjet disa shtetasve, ndër ta, 40-vjeçari i kapur në Korfuz.

Punohet intensivisht për lokalizimin dhe kapjen e shtetasve të tjerë të shpallur në kërkim në lidhje me këtë rast. Në bashkëpunim me homologët grekë, Interpoli i Tiranës po punon për finalizimin e procedurave për ekstradimin në Shqipëri, të 2 të ndaluarve.