Tregu i sigurimit të pronave është i përqendruar në Tiranë

Tregu i sigurimit të pronave vazhdon të jetë i përqendruar në Tiranë. Të dhënat nga raporti i Gjeografisë së Sigurimeve, nga Autoriteti i Mbikëqyrjes Financiare (AMF), tregojnë se sigurimi i pronave vazhdon të ketë një shkallë të lartë përqendrimi në kryeqytet, ndërsa pjesa tjetër e vendit ka një mbulim të papërfillshëm kundër fatkeqësive natyrore, zjarrit apo dëmtimeve të tjera në pronë.

Për vitin 2025, afërsisht 92% e primeve të shkruara bruto për sigurimet nga zjarri dhe forcat e natyrës, si dhe dëmtime të tjera në pronë ishin të përqendruar në Qarkun e Tiranës, në rritje të mëtejshme nga niveli prej 91% i një vitit më parë.

Përqendrimi i këtij produkti në Tiranë është shumë i lartë edhe në numrin e kontratave të sigurimit, me 85% të numrit total të tyre, në rritje nga niveli prej rreth 80% i një vitit më parë.

Veç diferencave në zhvillimin ekonomik mes Tiranës dhe pjesës tjetër të vendit, përqendrimi i këtij produkti në kryeqytet lidhet shumë edhe me tregun e pasurive të paluajtshme dhe me ecurinë e kredisë bankare.

Duke qenë se një pjesë e konsiderueshme e blerjeve të pasurive të paluajtshme financohen me kredit, dhe duke qenë se tregu i pronave dominohet nga Tiranë, edhe primet e sigurimit nga katastrofat janë tejet të përqendruar në Tiranë. Një arsye që e rrit edhe më shumë përqendrimin e primeve në Tiranë është vlera e pronave të siguruara. Duke qenë se në Tiranë vlera e pronës apo e përgjegjësisë së siguruara është më e lartë, atëherë edhe primet e sigurimit janë në vlera më të madhe.

Vitin e kaluar, në Shqipëri u shitën rreth 63 mijë policë për sigurimin e pronës nga katastrofat, nga të cilat pothuajse 54 mijë i takonin Qarkut të Tiranës.

Nëse të gjitha policat e sigurimit të pronës do të llogarisnim si sigurime banesash, do të rezultonte se në Shqipëri, në rastin më të mirë, janë të siguruara jo më shumë se 5.8% e numrit të përgjithshëm të banesave (dhe iu referuar Censit 2023).

E llogaritur vetëm për qarkun e Tiranës, kjo mesatare rritet ndjeshëm në 16.6%. Ndërkohë, për pjesën tjetër të vendit mbulimi mesatar me sigurime prone zbret në nivelin 1.2%.

Qeveria shqiptare në vitet e fundit ka konsultuar publikisht një projektligj për sigurimin e detyrueshëm të banesave nga tufetet. Ai përcakton detyrimin për sigurimin e të gjitha banesave në vend, me pak përjashtime (psh. shtëpitë e ndërtuara prej argjile, qerpiç, kallami apo ndërtesat me vendndodhje të lëvizshme apo të përkohshme).

Skema e sigurimit do të administrohet nga një ent i posaçëm me kapital shtetëror që do të ngrihet për këtë qëllim, Fondi Kombëtar për Sigurimin e Detyrueshëm nga Tufetet.

Shuma e sigurimit do të përcaktohet me vendim të Këshillit të Ministrave, ndërsa primi i sigurimit që do të paguajnë pronaret e banesave do të përcaktohet nga Fondi për tufetet, pas marrjes së pëlqimit nga ministri përgjegjës për Financat. Për shtresat nevojëshme, primi i sigurimit do të financohet nga buxheti i shtetit.

Vitin e kaluar, primet e sigurimit nga zjarri, forcat e natyrës dhe dëmtimeve të tjera në pronë arritën vlerën totale të 2.83 miliardë lekëve, ose rreth 29.2 milionë eurove.

Kjo shumë përkthehet në më pak se 13 euro prime sigurimi në vit për frymë, ose afërsisht 39 euro për familje.