Holanda nuk do të marrë pjesë në Eurovizionin 2027 për shkak të pjesëmarrjes së Izraelit

Holanda nuk do të marrë pjesë në Eurovizionin 2027, duke u rikthyer në vendimin e mëparshëm për bojkotin e festivalit. Transmetuesi publik holandez NPO ka njoftuar se vendi do të bojkotojë sërish kompeticionin për shkak të pjesëmarrjes së Izraelit dhe kundërshtimeve që kjo çështje ka shkaktuar në vend.

Vendimi vjen pas një periudhe pasigurie, pasi në shtator NPO kishte njoftuar se Holanda do të rikthehej në garën muzikore evropiane, pas bojkotit të edicionit të vitit 2026. Megjithatë, mbështetja për këtë rikthim nuk u siguroi dhe asnjë transmetues holandez nuk pranoi të merrte përsipër organizimin e pjesëmarrjes së vendit në konkurs.

Drejtori i medias në NPO, Jurre Bosman, deklaroi se pjesëmarrja e Izraelit ka shkaktuar reagime të ndryshme dhe përçarje në shoqërinë holandeze. Pas konsultimeve me bordin e transmetuesve, NPO vendosi të tërhiqet nga edicioni i ardhshëm.

Kryetari i bordit të NPO-së, Jet de Ranitz, pranoi se vendimi do të zhgënjejë shumë fansat holandezë të Eurovizionit, duke theksuar se transmetuesi do të vazhdojë ta transmetojë festivalin për publikun vendas.

Presioni kundër pjesëmarrjes së Izraelit është i fortë në Evropë, për shkak të luftës në Gaza. Në vitin 2026, Holanda ishte mes pesë vendeve që bojkotuan festivalin, së bashku me Irlandën, Islandën, Spanjën dhe Slloveninë. Kundërshtimet lidhen me përfshirjen e Izraelit në garën dhe me pasojat e fushatës së tij ushtarake në Gaza.

Edhe Irlanda ka konfirmuar se nuk do të marrë pjesë në Eurovizionin 2027, ndërsa në Spanjë vazhdon debati për vijimin e bojkotit. Ndërkohë, organizatorët kanë njoftuar ndryshime në rregullat e festivalit, por këto masa nuk kanë mjaftuar për të shmangur tërheqjet.

Eurovizioni i vitit 2027 pritet të zhvillohet në qytetin Burgas të Bullgarisë. Pavarësisht bojkotit, transmetuesi holandez ka bërë të ditur se publiku do të mund ta ndjekë festivalin në kanalet televizive të vendit.