Balla pas takimit me ambasadoren e BE-së: Bisedë e frytshme mbi anëtarësimin në BE

Kryetari i Grupit Parlamentar të PS-së, Taulant Balla, ka takuar këtë të mërkurë drejtuesen e re të Delegacionit të Bashkimit Evropian në Shqipëri, ambasadoren Sofia Moreira de Sousa. Lajmi është bërë i ditur nga vetë Balla në rrjetin social Facebook.

Përkrah fotos së shpërndarë me Sofia Moreira de Sousa, Balla shkruan se në fokus të takimit ka qenë agjenda e anëtarësimit të Shqipërisë në BE, e cila, sipas tij, është një objektiv strategjik kombëtar.

“Një bisedë e frytshme me Drejtuesen e re të Delegacionit të Bashkimit Evropian në Shqipëri, Ambasadoren Sofia Moreira de Sousa, mbi agjendën e anëtarësimit të Shqipërisë në BE dhe rëndësinë e ruajtjes së ritmit dhe momentumit të negociatave.

Kuvendi i Shqipërisë ka një rol thelbësor në këtë proces historik, përmes avancimit të reformave, përafrimit të legjislacionit me acquis të BE-së dhe forcimit të mbikëqyrjes parlamentare.

Anëtarësimi në Bashkimin Evropian është një objektiv strategjik kombëtar, që kërkon angazhim të qëndrueshëm, përgjegjësi institucionale dhe bashkëpunim të ngushtë me partnerët tanë evropianë”, ka shkruar Balla.