Krijohet regjistri elektronik për personat nën hetim për vepra penale kundër shtetit

Këshilli i Ministrave ka miratuar krijimin e regjistrit elektronik për personat nën hetim për vepra penale kundër shtetit, rendit dhe sigurisë publike, si pjesë e paketës kundër dhunës, që u prezantua pas protestave studentore.

Regjistri do të përfshijë të dhënat identifikuese të personave që janë pjesëmarrës në tubime. Policia Kufitare do të ketë akses të kufizuar në regjistrin elektronik dhe mund të refuzojë daljen jashtë vendit të personave që synojnë të shmangen ndjekjes penale, ndalimit, arrestimit ose ekzekutimit të dënimit me burg, edhe nëse ndaj tyre nuk ka masë sigurie.

Nëse u lejohet lëvizja, Policia Kufitare do t'ia njoftojë autoritetet e vendit ku do të udhëtojë personi dhe strukturat akomoduese për rrezikun që mund të paraqesë personi.

Regjistri do të administrohet nga Drejtoria e Përgjithshme e Policisë së Shtetit dhe do të përmbyllë të dhënat e personave të identifikuar në materialet e referuara nga Policia e Shtetit në Prokurori, për të cilët dokumentohen veprime konkrete të dhunshme.

Regjistri do të përfshijë të dhënat e personave të referuar ose nën hetim për vepra penale kundër autoritetit shtetëror, rendit dhe sigurisë publike, të parashikuar në seksionet I dhe III, të kreu VIII, të pjesës së posaçme të Kodit Penal, por pa u kufizuar në to, kur faktet përfshijnë kryerjen e veprimeve të dhunshme në dëm të jetës dhe shëndetit të personit ose pronës publike dhe private në grumbullime e manifestime publike.