"Ilir Kulla: Ka një vijë të kuqe për SHBA-në, por ka edhe çështje të toleruara"

Ilir Kulla, eksperti i sigurisë, ka komentuar mungesën e reagimit të drejtpërdrejtë të ambasadorit amerikan për tensionet politike në Shqipëri. Ai deklaroi se diplomatit i nevojitet kohë për të njohur realitetin shqiptar dhe se ka çështje të toleruara për partnerët amerikanë.

"Para njëherësh, ambasadori amerikan është i sapoardhur. Do t'i duhet dhe atij disa javë kohë të kuptojë çfarë ndodh në këtë vend. E dyta, unë nuk mendoj se ambasadori amerikan ka ndërmend që të marrë në dorë qeverinë e vendit kur këtë duhet ta bëjnë vetë shqiptarët", deklaroi Kulla.

Megjithatë, eksperti theksoi se ka çështje të cilat, sipas tij, partnerët amerikanë nuk tolerojnë ndërhyrje apo cenim të funksionimit të institucioneve, duke veçuar SPAK-un.

"Sigurisht që ka disa pika të cilat ata nuk i tolerojnë, siç është çështja e SPAK-ut apo, ku di unë, disa gjëra të tjera që kanë të bëjnë me mënyrën se si funksionojmë ne brenda vetes", u shpreh ai.

Sipas Kullës, zgjidhja e tensioneve politike nuk mund të vijë vetëm nga ndërkombëtarët, por kërkon përgjegjësi dhe reflektim si nga mazhoranca, ashtu edhe nga protestuesit.

"Kjo është një tango që kërcejnë dysh. Pra edhe ata që janë në qeveri, edhe ata që janë në rrugë", theksoi eksperti.

Gjatë intervistës, Kulla u ndal edhe te kryeministri Edi Rama, duke vlerësuar se ai ka ende mundësi të ndryshojë qasjen ndaj problemave me të cilat përballet vendi.

"Gjëja që mua më bën të mendoj dhe të shpresoj që, përtej asaj çfarë deklaron, kryeministri e ka kohën për ta marrë ende kthesën dhe të bëjë disa gjëra shumë të rëndësishme për vendin, tek e fundit edhe për veten e vet. Edhe për qeverinë e vet", deklaroi Kulla.

Ai argumentoi se drejtimi i qeverisë shqiptare është bërë veçanërisht i vështirë për shkak të përqendrimit të vendimmarrjes në zyrën e kryeministrit.

"Puna e kryeministrit të Shqipërisë është punë e vështirë, sepse realisht kështu e kanë krijuar sistemin këta, që të gjitha kalojnë te zyrat e kryeministrit, pavarësisht se si e ka emrin", tha ai.

Eksperti i sigurisë solli si shembull çmimet e karburanteve, për të argumentuar se qeveria duhet të jetë më pranë realitetit ekonomik të qytetarëve. Sipas tij, mjafton një krahasim i çmimeve me vendet e tjera për të kuptuar nevojën për masa konkrete që lehtësojnë barrën financiare të qytetarëve.

"Çështja është që kryeministri duhet të jetojë me realitetin. Dhe nuk është se do ndonjë diferencë të madhe ta kuptosh, shko te pompa e benzinës, te karburanti, ta shohësh që ne e kemi 2 euro e gjysmë, Italia e ka 2.2, 2.1, 2.3. Pse? Se zonja Meloni ka hequr akcizat", u shpreh Kulla.

Shifrat dhe krahasimi i politikave fiskale të përmendura prej tij nuk janë verifikuar në mënyrë të pavarur. Në përfundim, Kulla theksoi rëndësinë e komunikimit të qeverisë me qytetarët dhe ngriti pyetjen nëse përlasjet e fundit kanë shërbyer si një moment reflektimi për drejtuesit politikë.

"Çështja është kush komunikon dhe si komunikon. Pra, a ka shërbyer ky shpërhim dhunë për të reflektuar në raport me realitetin dhe disa gjëra? Unë mendoj që po", deklaroi eksperti i sigurisë.