Dejan Soskic, një kandidat i mundshëm për kryeministër i Serbisë

Dejan Soskic, një ekonomist dhe akademik me përvojë, është një nga emrat që shihen si kandidatë të mundshëm për postet më të larta në qeverinë e re të Serbisë. Ai është një figurë e rëndësishme në Listën Studentore, e cila fitoi zgjedhjet parlamentare dhe shënuan një goditje të fortë për Aleksandar Vuçiçin.

Soskic është një ish-guvernator i Bankës Qendrore të Serbisë, një pozicion që e mori në vitin 2010, përpara se Vuçiç të vinte në pushtet. Ai dha dorëheqjen në vitin 2012, në shenjë proteste ndaj ndryshimeve ligjore të ndërmarra nga qeveria e re, të cilat, sipas tij, cenonin pavarësinë e institucionit monetar. Në letrën e dorëheqjes, ai i cilësoi ndryshimet si një “ligj të keq”.

Karriera e tij akademike nisi në Universitetin e Beogradit, ku u diplomua në vitin 1989 dhe u vlerësua si studenti i vitit. Më pas, si përfitues i bursës Fulbright, ai dha mësim për bankat dhe financat në Shtetet e Bashkuara, Austri dhe Itali, përpara se të merrte poste drejtuese në Serbi.

Përvoja në institucionet shtetërore dhe qëndrimi i tij kundër ndërhyrjeve politike në pavarësinë e bankës qendrore e bëjnë atë një nga emrat që mund të marrin përgjegjësi të rëndësishme në administratën e re.

Përtej ndryshimit politik në Beograd, një nga çështjet më të rëndësishme për qeverinë e re do të jetë orientimi ndërkombëtar i Serbisë, veçanërisht marrëdhëniet me Bashkimin Evropian, Rusinë dhe Ukrainën. Soskic ka deklaruar se synimet e Listës Studentore janë në përputhje me vlerat e Bashkimit Evropian, duke shtuar se Serbia mund të jetë një partnere e sinqertë në përpjekjet për paqe, stabilitet dhe prosperitet në rajon.

Megjithatë, ai nuk ka dhënë një përgjigje të prerë për çështjen e anëtarësimit të Serbisë në BE, duke theksuar se kjo temë do të mund të shtrohet për referendum në vend. Edhe më e paqartë mbetet qasja e mundshme e qeverisë së re ndaj Rusisë. Lista Studentore ka deklaruar se nuk mbështet vendosjen e sanksioneve kundër Moskës, ndërsa Soskic ka shprehur rezerva për mbështetjen që Vladimir Putini i dha Vuçiçit gjatë zgjedhjeve.