Netanyahu mbetet larg shumicës parlamentare në Izrael

Zgjedhjet parlamentare në Izrael janë nxjerrë me rezultat të ngushtë, pa një fitues që mund të sigurojë shumicën parlamentare. Blloku i kryeministrit Benjamin Netanyahu pritet të sigurojë 53 mandate, ndërsa blloku i drejtuar nga Gadi Eisenkot parashikohet të marrë 48 mandate. Asnjëri prej tyre nuk arrin shumicën prej 61 mandate në parlamentin me 120 vende, duke lënë të hapur mundësinë e negociatave të vështira për formimin e qeverisë së ardhshme.

Rezultati paraprak ka ndryshuar nga parashikimet e sondazheve të publikuara para zgjedhjeve dhe nga sondazhet në dalje të qendrave të votimit, të cilat favorizonin bllokun e Eisenkotit. Gjatë numërimit të votave, blloku i Netanyahut kaloi në avantazh.

Sipas të dhënave të deritanishme, Likud i Netanyahut është partia më e madhe me 26 mandate, e ndjekur nga Yashar e Eisenkotit me 21 mandate. Partia B'Yachad e Naftali Bennett dhe Lista e Përbashkët kanë nga 12 mandate secila, ndërsa Demokratët e krahut të majtë kanë siguruar tetë vende.

Numërimi nuk ka përfunduar ende. Sipas Komitetit Qendror të Zgjedhjeve, mbeten për të numëruar rreth 430 mijë deri në 480 mijë vota me zarf të dyfishtë, të cilat u perkasin kryesisht ushtarëve, të burgosurve, diplomatëve jashtë vendit dhe personave të tjerë që nuk kanë mundur të votojnë në qendrat e tyre të zakonshme.

Këto vota mund të ndikojnë në ndarjen përfundimtare të mandateve. Numërimi i tyre pritet të përfundojë të enjten në mbrëmje, ndërsa rezultatet zyrtare të zgjedhjeve parashikohet të publikohen më 4 nëntor.