Alizoti: Kur pushteti përdor dhunën, ai është në fundin e tij

Deputeti demokrat Tomor Alizoti u shpreh se opozita zgjodhi formën e protestës sot në seancën plenare në Kuvend, pasi në rendin e ditës duhej të ishte kriza politike dhe protesta disa-ditore në Tiranë.

Alizoti tha se përse qeveria përpiqet që të mohojë krizën politike, aq më shumë sipas tij shtohet revolta e qytetarëve.

Sipas Alizotit, lideri politik në një moment krize në Shqipëri duhet të japë dorëheqjen, për të krijuar paqe sociale në vend.

“Qeveria kineze gjatë kohës që njerëzit vriteshin me tanka, miratonte një plan për bujqësinë. Shqipëria sot ka nevojë për mendje të arsyeshme e racionale. Këta përpiqen ta mohojnë krizën, por kriza ishte aty. Duhet të ishte në rend dite kriza dhe revolta e studentëve, prandaj ne protestonim. Ne po përpiqemi ta bëjmë revoltën në mënyrën tonë. Ju i keni provuar vetë plumbat e gomës. Përse? Që të rrijë një individ. Lideri në moment krize duhet të japë dorëheqjen dhe të krijojë një paqe sociale.

Sfida e opozitës shqiptare është të dëgjojë zemërimin e njerëzve. S’mund të vijë zv.kryeministrja miliardere dhe të votojë atje. Ju e keni provuar vetë dhunën e Policisë. Policia është për qytetarin dhe jo kundër qytetarit. Kur një pushtet përdor dhunën, ai është në fundin e tij. Studentët të vijojnë protestën. Ju jeni rritur pa mite”, u shpreh Alizoti.