AKEP miraton rregulloren e re për telefoninë celulare, çfarë ndryshon për konsumatorët

Bordi i Autoritetit të Komunikimeve Elektronike dhe Postare (AKEP) miratoi rregulloren e re për mbrojtjen e konsumatorëve të telefonisë celulare, e cila parashikon ndryshime të rëndësishme për përdoruesit e telefonisë celulare. Rregullorja e re parashikon vlefshmëri 12-mujore të kartave SIM, afat minimal prej 180 ditësh për kredinë monetare dhe mundësi rimbushjeje me vlera të ulëta për konsumatorët.

Përveç kësaj, konsumatorët do të kenë të drejtën për të kërkuar rimbursimin e kreditit monetar të papërdorur kur numri portohet te një operator tjetër. Rregullorja parashikon gjithashtu më shumë transparencë për tarifat dhe ruajtjen e numrit celular për të paktën 12 muaj pas çaktivizimit.

Nga 1 janari 2027, nuk do të lejohen klauzola që parashikojnë rritje automatike të tarifave mujore në përqindje ose sipas indekseve të ndryshueshme, përfshirë Indeksin e Çmimeve të Konsumit (IÇK), kur vlera konkrete e tarifës së ardhshme nuk është përcaktuar në momentin e lidhjes së kontratës. Masat do të zbatohen sipas afateve të përcaktuara në rregullore, duke nisur nga data 1 janar 2027.