LEDION LIÇO NË REVISTËN PRESTIGJOZE “HARPER’S BAZAAR ITALIA”

Moderatori shqiptar Ledion Liço është bërë protagonist i një editoriali fotografik për revistën prestigjioze “Harper’s Bazaar Italia”, në një projekt realizuar në Venecia, ku moda, arkitektura historike dhe eleganca bashkëkohore ndërthurën në një rrëfim vizual.

Në publikimin e datës 28 tetor, revista italiane i kushton vëmendje figurës së Liços, duke e prezantuar si një prezantues televiziv dhe showman nga Ballkani, me një profil që shtrihet përtej kufijve shqiptarë. Projekti është realizuar në ambientet e Sina Centurion Palace, një hotel luksoz buzë Kanalit të Madh, i vendosur në një ndërtesë historike të Venecias.

Zgjedhja e moderatorit shqiptar është bërë nga drejtoresha artistike Daniela Delia, e cila ka synuar të sjellë në fokus një figurë që ndërthur identitetin kulturor me një perspektivë ndërkombëtare.

Fotografitë janë realizuar nga Lorenzo Taliani, ndërsa veshjet e përzgjedhura janë krijime të markes E.po.ca. Stili karakterizohet nga linja minimaliste, prerje të kurrizuar dhe elegancë e përmblajtur, pa teprime.

Një histori mes traditës dhe modernes

Editoriali nuk përqendrohet vetëm te veshjet dhe imazhi i moderatorit, por ndërton një lidhje mes tij dhe vendit ku është realizuar projekti. Sina Centurion Palace ndodhet në Palazzo Genovese, një ndërtesë e shekullit XIX, e njohur për arkitekturën neogotike dhe pozicionin e saj përgjatë Kanalit të Madh.

Ndërthurja e elementeve historike me dizajnin bashkëkohor përben boshtin e konceptit fotografik. Sipas idesë së projektit, ashtu si pallati ruan identitetin e tij historik duke iu përshtatur kohës moderne, edhe Ledion Liço përfaqëson një profil që ruan lidhjen me origjinën kulturore, ndërsa mbetet i hapur ndaj ndikimeve dhe përvojave të reja.

Përmes këtij realizimi, moderatori shqiptar shfaqet në faqet e një prej revistave të njohura ndërkombëtare të mode dhe stilit të jetesës, në një projekt që bashkon fotografinë, modën dhe arkitekturën në një atmosferë të rafinuar.

Editoriali në Venecia shënon një tjetër dalje të Ledion Liços përtej ekranit televiziv, këtë herë në një kontekst ku vëmendja i kushtohet stilit, imazhit dhe komunikimit vizual.