Fitorja e studentëve në Serbi, dorëheqje në televizionin shtetëror

Fitorja e studentëve në zgjedhjet parlamentare në Serbi ka sjellë një seri të ngjarjeve në median publike. Drejtoresha e televizionit shtetëror RTS, Manja Gërciç, ka dhënë dorëheqjen, duke deklaruar se e kupton se një pjesë e publikut e konsideron qëndrimin e saj në krye të RTS-së si pengesë për ndryshimet e kërkuara. Gërciç ishte emëruar në këtë post në shkurt të këtij viti, me një mandat pesëvjeçar.

Dorëheqja vjen pas kërkesës së Listës Studentore, e cila doli fituese në zgjedhjet e së dielës, për largimin e menjëhershëm të drejtuesve dhe redaktorëve të lajmeve në televizionin publik. Studentët i kanë akuzuar ata për mbulim të njëanshem të zhvillimeve politike dhe mosrespektimin e standardeve profesionale të gazetarisë.

Sipas përditësimit të fundit të Komisionit Zgjedhor, Lista Studentore ka siguruar 140 nga 250 vendet në parlament, ndërsa Partia Progresiste Serbe e presidentit Aleksandër Vučić ka marrë 104 mandate. Rezultati mbetet ende i papërfunduar.

Ndryshimet në median publike nuk janë kufizuar vetëm te RTS-ja. Televizioni publik i Vojvodines ka kërkuar falje shikuesve, duke pranuar se për vite me radhë nuk e kishte përmbsuhur misionin e tij publik për shkak të raportimit të njëanshem dhe mungesës së pyetjeve kritike.

Ndërkohë, organizata ndërkombëtare Reporterët pa Kufij ka renditur Serbinë në vendin e 104-t nga 180 shtete në indeksin e lirisë së shtypit për vitin 2026, pozicioni më i dobët i regjistruar për vendin në historinë e këtij vlerësimi.