Ilir Daja "nuk e mbajnë nervat" dhe ndëshkohet me të kuq në derbin e Tiranës
Trajneri i Dinamos, Ilir Daja, u ndëshkua me karton të kuq dhe u përjashtua nga pankina në derbin e Tiranës kundër Tiranës, pasi protestoi ashpër ndaj vendimeve të gjyqtarit.
Pjesa e parë e derbit të Tiranës kundër Dinamos u mbyll me rrjeta të paprekura, 0-0, por jo pa tensione. Në minutën e 27-të, Rifa u ndëshkua me karton të kuq dhe Dinamo u la me një lojtar më pak. Pak çaste më vonë, tensioni përfshiu edhe pankinën e skuadrës dinamovite. Trajneri Ilir Daja protestoi ashpër ndaj vendimeve të gjyqtarit, me Enea Jorgjin që fillimisht e ndëshkoi me karton të verdhë. Por situata doli shpejt jashtë kontrollit. Protestat dhe debatet mes Dajës dhe arbitrit të katërt vijuan, duke bërë që Jorgji t'i tregonte trajnerit kartonin e dytë të verdhë, që u pasua me të kuqin dhe përjashtimin e tij nga pankina në minutën e 40-të. Momenti më i tensionuar erdhi teksa Daja po largohej nga fusha. Trajneri i Dinamos iu afrua arbitrit të katërt në një situatë që rrezikoi të përshkallëzohej në përplasje fizike, por ndërhyrja e forcave të sigurisë shmangu përplasjen. Kaosi nuk u ndal me kaq. Në pjesën e parë, me karton të kuq u ndëshkua edhe përgatitësi atletik i Dinamos, Dodaj, duke e kthyer derbin në një ndeshje të mbushur me tension, protesta dhe polemika që në 45 minutat e para.