Tirana dhe Dinamo barazojnë në një ndeshje të tensionuar

Ndeshja nisi me ritëm dhe rivalitet, por ekuilibri në fushë u prish në minutën e 27', kur Oresti Rifa u ndëshkua me karton të kuq. Vendimi shkaktoi reagime të forta në kampin dinamovit, që kundërshtoi menyrën se si po drejtohej takimi nga arbitri Enea Jorgji.

Situata u përshkallëzua edhe më tej pranë pankinës së Dinamos. Trajneri Ilir Daja, i pakënaqur me vendimet e gjyqtarit, u ndëshkua fillimisht me karton të verdhë. Protestat vijuan dhe arbitri vendosi t'i tregonte kartonin e dytë të verdhë, duke e përjashtuar nga pankina në minutën e 40'.

Largimi i Dajës nuk kaloi pa incidente. Teksa po linte zonën e pankinës, trajneri dinamovit u përfshi në një moment të tensionuar me arbitrin e katërt, ndërsa ndërhyrja e forcave të sigurisë ndihmoi në shmangien e përshkallëzimit të situatës. Në pjesën e parë u përjashtua gjithashtu përfaqësuesi atletik i Dinamos, Dodaj.

Kështu, skuadra e Ilir Dajës e mbylli fraksionin e parë në kushte të vështira, me një lojtar më pak në fushë dhe pa trajnerin e saj në pankinë. Megjithatë, rezultati mbeti 0-0, duke lehtësuar gjithçka për 45 minutat e dyta.

Pas pushimit, Tirana kërkoi të shfrytëzojë epërsinë numerike për të marrë kontrollin e lojes dhe për të gjetur golin. Bardheblutë arritën ta zhbllokoheshin rezultatin në minutën e 64', kur Redon Xhixha dërgoi topin në rrjetë, duke i dhënë skuadrës së tij avantazhin 1-0. Në atë moment, Tirana dukej se kishte krijuar kushtet për të menaxhuar pjesën e mbetur të takimit. Dinamo, megjithatë, tregoi se nuk kishte ndërmend të hiqte dorë nga derbi, pavarësisht vështirësive të krijuara nga përjashtimet dhe disavantazhi numerik.

Në minutën e 78', Hoxhallari shënoi golin e barazimit, duke rikthyer ekuilibrin në rezultat dhe duke rihapur plotësisht ndeshjen. Goli i Dinamos ndryshoi dinamikën e minutave të fundit, pasi bardheblutë humbën avantazhin që kishin siguruar me Xhixhën. Barazimi ishte një tregues i rezistencës së Dinamos, e cila, edhe në një ndeshje të vështirësuar nga kartonet e kuq dhe tensioni, arriti të rikthehej në lojë dhe të mos largohej nga Durrësi duarbosh.

Kur dukej se dy skuadrat do të ndanin pikët pa ndryshime të tjera në rezultat, minutat e fundit sollën epizod të reja që shtuan nervozizmin në fushë. Tirana pretendoi se kishte gjetur golin, por rrjeta e bardhebluve nuk u pranua, duke hapur një tjetër moment diskutimi në një takim që deri atëherë ishte karakterizuar nga vendime të kontestuara dhe protesta të vazhdueshme.

Situata u bë edhe më e vështirë për skuadrën bardheblu, pasi Basilio Ndong u ndëshkua me karton të kuq. Kështu, Tirana e përfundoi derbin me një lojtar më pak, në një mbyllje që konfirmoi se tensioni nuk ishte kufizuar vetëm në pjesën e parë. Dinamo pati gjithashtu mundësinë për të përmbysur plotësisht rezultatin, pasi goditi shtyllën në fund të takimit. Megjithatë, topi nuk përfundoi në rrjetë dhe shifrat mbetën 1-1.

Derbi i zhvilluar në Durrës prodhoi dy gola, por edhe shumë më tepër: përjashtime, kundërshti ndaj arbitrimit, epizoda të tensionuara pranë pankinës dhe një fund me pretendime për golin e anuluar të Tiranës.