Francë: Ministri i Brendshëm alarmon për protestat e 31 tetorit

Ministri i Brendshëm francez, Laurent Nunez, ka dërguar një udhëzim zyrtar prefektëve, duke kërkuar organizimin e një strukture të fuqishme operacionale për ruajtjen e rendit publik. Ai paralajmëron se autoritetet kanë identifikuar thirrje për grumbullime në qendrat e qyteteve dhe në sheshet publike, nën pretekstin e festimeve të Halloween-it.

Sipas vlerësimit të tij, mënyra e organizimit dhe përmblodhja e këtyre thirrjeve tregojnë se disa prej organizatorëve mund të synojnë përfshirjen në akte dhunë dhe dëmtime të pronës. Në rrjetet sociale kanë qarkulluar mesazhe që ftojnë qytetarët të mblidhen në sheshet kryesore të Francës duke nisur nga ora 20:00. Disa prej këtyre thirrjeve përdorin parulla si "Të gjithë me maska, gjatë gjithë natës" dhe "Nata e errësirës", duke ndërthurur simbolikën e Halloween-it me protestat kundër politikave ekonomike dhe sociale.

Megjithatë, Le Parisien vëren se këto mesazhe nuk kanë marrë deri tani një përhapje veçanërisht të gjerë. Një media aktiviste ka bërë gjithashtu thirrje për organizimin e marshimeve të natës me kostume, në kuadër të fazës së tretë të mobilizimit protestues.

Ministri Nunez ka kërkuar prefektëve t'u kushtojnë vëmendje të veçantë grumbullimeve pas orës 20:00, për shkak të mundësisë së krijimit të marshimeve spontane dhe të paautorizuara. Policia e Parisit rikujton kufizimet ligjore, duke paralajmëruar se pjesëmarrësit në tubime nuk lejohen të fshehin fytyrën ose të mbajnë armë, përfshirë edhe imitimet e tyre.

Paralajmërimi vjen ndërsa disa aktivistë kanë propozuar përdorimin e kostumeve dhe maskave për t'u dhënë protestave karakterin e një karnavali. Autoritetet shqetësohen se grumbullimet e madhe gjatë natës mund ta vështirësojnë identifikimin e personave që kryejnë shkelje dhe ndërhyrjen e forcave të rendit. Shqetësimet e qeverisë lidhen edhe me incidentet gjatë mobilizimeve të mëparshme.