Rama po frikëson protestuesit me gjoba deri në 6 mijë dollarë

Gazeta britanike The Guardian raporton se qeveria shqiptare ka miratuar masat e reja ligjore për protestat që përshkallëzojnë në dhunë. Sipas medias britanike, qeveria shqiptare ka vendosur gjoba deri në 500 mijë lekë, ekuivalente me rreth 5 500 euro ose 6 130 dollarë, për personat që zgjedhin të qëndrojnë në një turmë ku ndodhin akte dhune ose grabitje në hapësira publike.

Masat nuk kufizohen vetëm te personat që kryejnë drejtpërdrejt veprime të dhunshme. Sipas raportimit, ato mund të prekin edhe pjesëmarrësit që vijojnë të qëndrojnë në një tubim ku ndodhin incidente.

Gazeta e vendos këtë zhvillim në kontekstin e protestave kundër qeverisë, të cilat kanë vijuar prej muajsh në Tiranë dhe që, gjatë ditëve të fundit, kanë sjellë përplasje ndërmjet protestuesve dhe forcave të sigurisë.

Sipas përshtypjes së medias britanike, lëvizja protestuese nisi në mënyrë paqësore në maj, me kundërshtimin e një projekti hoteli luksoz në një rezervat natyror, të mbështetur nga Jared Kushner, dëndri i presidentit amerikan Donald Trump.

Në mesin e tetorit, protestat morën një dimension më të gjerë, me pjesëmarrjen e studentëve dhe ngjitjen e shqetësimeve për korrupsionin e pretenduar, problemet në sistemin shëndetësor dhe mundësitë e kufizuara për të rinjtë.

Duke iu referuar nivelit të pagave në Shqipëri, The Guardian vëren se paga mesatare mujore bruto arrin rreth 930 euro, ndërsa gjoba maksimale e parashikuar nga masat e reja është pothuajse gjashtë herë më e lartë.

Përveç sanksioneve financiare, ndryshimet u japin autoriteteve policore kompetencë për të kufizuar përkohësisht tubimet pranë institucioneve arsimore, shëndetësore dhe qeveritare, në rastet kur ekziston rreziku i dhunës.

Paketa përfshin gjithashtu masën kundër nxitjes së dhunës në internet dhe mekanizma kompensimi për bizneset e vogla që pësonin dëme gjatë protestave.

Sipas raportimit, masat hyjnë menjëherë në fuqi, por duhet të marrin miratimin e Parlamentit brenda 45 ditëve për të vijuar zbatimin.

Gazeta citon gjithashtu kryeministrin Edi Rama, i cili ka deklaruar se është mbështetur në një nismë ligjore franceze që synon t'i bëjë protestuesit financiarisht përgjegjës për dëmet e shkaktuara gjatë demonstratave.

The Guardian shkruan se Rama ka fajësuar në mënyrë të përsëritur aktorët e huaj për dhunën dhe ka akuzuar Rusinë dhe Iranin për përhapjen e dezinformimit në internet. Në kohësisht, kryeministri ka bërë thirrje për dialog.

Raportimi i gazetës britanike e paraqet paketin e re ligjore si pjesë të përgjigjes së qeverisë ndaj protestave të vazhdueshme, duke vënë në qendër ashpërsinë e gjobave dhe mundësinë e zbatimit të tyre edhe ndaj pjesëmarrësve që nuk kryejnë personalisht akte dhune.