Manjani: Guvernatori duhet mbrojtur nga qeveria jo nga drejtësia

Juristi Ylli Manjani komentoi ndryshimin e ligjit për guvernatorin e Bankës së Shqipërisë në emisionin "Now" në Euronews Albania. Manjani tha se guvernatori duhet të ketë pavarësi absolute nga qeveria, por jo imunitet përballë hetimit nga Prokuroria.

"Guvernatori parashikohet në kushtetutë dhe po të kishte dashur kushtetuta do ja kishte dhënë imunitetin. Ai nen është imunitet nga ndjekja penale sepse veprimet hetimore që mund të kryesh në rastin e një guvernatori në detyrë duhet t’i shoqërohet me kërkesë për autorizim nga parlamenti", tha Manjani.

Manjani shtoi se janë dy koncepte të ndryshme: pavarësia politike nga vendimi penal dhe pavarësia nga qeveria dhe politika. "Guvernatori duhet të ketë super pavarësi politike, një vendim të marrë në fushatë për ulje të interesit e ndihmon qeverinë. Kusht i padiskutueshëm është pavarësia nga qeveria dhe politika. Në ligin e bankës pavarësia e tij është shumë e fortë, nuk e shkarkon dot, duhet të kesh arsye të forta. Guvernatorin duhet ta mbrosh nga qeveria jo nga prokuroria", tha Manjani.