Qeveria po përgatit skemë të re fiskale për influencerët

Kryeministri Edi Rama ka paralajmëruar ngritjen e një sistemi të ri taksimi për ekonomia digjitale, duke nisur nga influencerët që gjenerojnë ardhura përmes ndjekësve dhe bashkëpunimeve tregtare, dhe duke vazhduar me aktivitetet e tregtisë online.

Rrjetet sociale nuk shërbejnë më vetëm si platforma komunikimi, por janë shndërruar në burim të ardhurash për individët dhe bizneset. Reklamimi i produkteve, promovimi i markave, bashkëpunimet me kompanitë dhe shitjet përmes platformave digjitale kanë krijuar një treg që zhvillohet pjesërisht jashtë kanaleve tradicionale të tregtisë.

Kryeministri Rama deklaroi më 28 tetor: “Ka ardhur koha e një sistemi të ri taksimi të ekonomisë digjitale, duke filluar nga ata që jetojnë goxha mirë... me lajke e followers-a dhe duke vazhduar me tregtinë e mirëfilltë digjitale.”

Deklarata sinjalizon synimin e qeverisë për të rritur kontrollin fiskal mbi të ardhurat që gjenerohen në internet. Megjithatë, mbetet ende e paqartë nëse nisma do të sjellë një normë të re tatimore për influencerët apo do të përqendrohet në forcimin e mekanizmave të deklarimit dhe mbledhjes së detyrimeve ekzistuese.

Sipas të dhënave të bërë publike nga Drejtoria e Përgjithshme e Tatimeve gjatë vitit 2025, verifikimet e kryera në bashkëpunim me bankat kishin evidentuar mbi 33 milionë euro të ardhura të gjeneruara nga individët përmes platformave digjitale, si Meta, Facebook, YouTube dhe Google. Megjithatë, kjo shifër nuk përfaqëson domosdoshmërisht përmasat reale të tregut, pasi një pjesë e të ardhurave nga aktivitetet online mund të mbetet jashtë sistemit të deklarimit dhe kontrollit fiskal.

Në këtë kontekst, gjatë vitit 2025, administrata tatimore u bëri thirrje individëve që siguronin të ardhura nga platformat digjitale të deklaronin ato në formularin e Deklaratës Individuale Vjetore të të Ardhurave (DIVA). Kjo nismë shënonte një përpjekje për të identifikuar dhe formalizuar të ardhurat nga ekonomia digjitale, ndërsa paralajmërimi i fundit i qeverisë për një sistem të ri taksimi të influencerëve e rikthen në vëmendje këtë sektor dhe sfidat e kontrollit të tij fiskal.

Çfarë paguajnë sot influencerët?

Legjislacioni shqiptar nuk parashikon një kategori të veçantë tatimore të quajtur “influencer”. Individët që sigurojnë të ardhura nga reklamat, promovimet dhe aktivitetet e tjera tregtare në rrjetet sociale trajtohen sipas natyrës së aktivitetit dhe statusit të tyre fiskal.

Kjo do të thotë se të ardhurat nga bashkëpunimet me kompani, përmblidhjet e sponsorizuara apo shërbimet e marketingut digjital nuk janë automatikisht të përjashtuara nga tatimi.

Për individët e regjistruar si persona fizike ose biznese zbatohen dispozitat përkatese të legjislacionit tatimor, ndërsa trajtimi konkret varet nga klasifikimi i aktivitetit, niveli i të ardhurave dhe regjimi fiskal ku përfshihen.

Në Shqipëri, bizneset e vogla në Shqipëri me xhiro bruto vjetore deri në 14 milionë lekë përfshihen nga normat e favorshme tatimore dhe mbeten të mbrojtura me tatim-fitimi 0% deri më 31 dhjetor 2029. Por nuk është sqaruar nëse nisma e paralajmëruar do të ndryshojë trajtimin fiskal të krijuesve të përmbajtjes që aktualisht përfshihen nga ky regjim. Nënkohë është ulur pragu për hyrjen e bizneseve në TVSH në 5 milionë lekë me paketin e re fiskale 2027.

Reklamat, dhuratat dhe pagesat nga platformat, sfida e kontrollit fiskal

Një nga vështirësitë e tatimit të ekonomisë digjitale lidhet me mënyrën se si realizohen dhe dokumentohen të ardhurat. Ndryshe nga aktivitetet tradicionale tregtare, bashkëpunimet e influencerëve mund të përfshijnë pagesa direkte nga kompanitë, të ardhura nga platformat ndërkombëtare, komisione nga shitjet ose produkte dhe shërbime të ofruara në këmbim të promovimit. Veçanërisht trajtimi i produkteve të marra në këmbim të reklamave ngre pyetje mbi mënyrën e vlerësimit dhe deklarimit të përfitimeve që nuk realizohen në para.

Një tjetër çështje lidhet me pagesat që vijnë nga platforma jashtë Shqipërisë, si YouTube, TikTok apo Instagram, dhe mundësinë e administratës për të identifikuar dhe deklaruar ato.