Shtetas turk, i kërkuar për vrasje në Maqedoninë e Veriut, arrestohet në kufirin shqiptar

Policia Kufitare në Morinë ka arrestuar një shtetas turk, i cili është i kërkuar nga autoritetet e Maqedonisë së Veriut për vrasje. 31-vjeçari u kap teksa tentonte të hynte në Shqipëri, ndërsa autoritetet kanë nisur procedurat për ekstradimin e tij.

Sipas njoftimit të Policisë, bëhet fjalë për shtetasin me inicialet B. K., banues në Turqi, të cilin shërbimet kufitare e identifikuan dhe e ndaluan pas shkëmbimit të informacionit me Interpol Tiranën.

Nga verifikimet rezultoi se autoritetet e Maqedonisë së Veriut e kishin shpallur 31-vjeçarin në kërkim ndërkombëtar për vrasje, bazuar në një vendim të Zyrës së Prokurorisë Publike në Shkup, të datës 27 tetor 2026.

Pas ndalimit, specialistët e Seksionit për Hetimin e Krimeve të Rënda në Drejtorinë Vendore të Policisë Kukës kryen procedurat për arrestimin e tij, me qëllim ekstradimin drejt Maqedonisë së Veriut.

Interpol Tirana, në bashkëpunim me autoritetet homologe maqedonase, po vijon procedurat për ekstradimin e 31-vjeçarit, i cili kërkohet nga drejtësia e vendit fqinj për akuzën e vrasjes.