Dy helikopterë përplasen në ajër pranë aeroportit në Oregon, tre viktimat identifikuar
Tre persona kanë humbur jetën pasi dy helikopterë u përplasën në ajër dhe u rrëzuan në një zonë rurale pranë aeroportit McMinnville në Oregon.
Aksidenti i rëndë ndodhi të enjten dhe shkaktoi edhe mbylljen e një autostrade në zonën përreth. Viktimat janë identifikuar si Tyler Sturdevant, 38 vjeç, pilot nga Oregon, Maddy Asboe, 22 vjeçe, instruktore fluturimi nga Teksasi, si dhe një student pilot nga Mbretëria e Bashkuar, identiteti i të cilit nuk është bërë ende publik.
Sipas raportimeve nga mediat e huaja, instruktorja 22-vjeçare dhe studenti britanik ndodheshin në bordin e njërit prej helikopterëve, ndërsa piloti 38-vjeçar ishte i vetëm në mjetin tjetër fluturues. Në aksident u përplasën një helikopter Robinson R22 dhe një Airbus H125. Pas përplasjes, të dy mjetet u rrëzuan në një fushë pranë aeroportit, duke pasur dëme të rënda. Ekipet e emergjencës mbërritën në vendngjarje rreth orës 14:15.
Pamjet nga zona tregojnë një prej helikopterëve të përmbysur në fushë, ndërsa tjetri është shkatërruar pothuajse plotësisht. Njëri prej helikopterëve i përkiste kompanisë Jerry Trimble Helicopters, e cila operon në aeroportin lokal dhe ofron programe trajnimi për pilotë helikopterësh. Shkaqet e përplasjes mbeten ende të paqarta. Autoritetet federale të aviacionit dhe Bordi Kombëtar i Sigurisë së Transportit kanë nisur hetimet për të zbardhur rrethanat e aksidentit tragjik.