Vjedhja më e madhe e kriptomonedhave në historinë e Binance

Hakerët kanë vjedhur rreth 6.3 miliardë dollarë nga Binance, platforma më e madhe në botë e shkrumbimit të kriptomonedhave, në një sulm që është konsideruar si grabitja më e madhe e aseteve digjitale në historinë e kriptomonedhave.

Sulmi u zhvillua brenda 20 minutash, më 29 tetor, duke ngritur pikëpyetje serioze mbi sigurinë e platformave që administrojnë miliarda dollarë në kriptomonedha. Sipas Binance dhe analizave të transaksioneve në blockchain, hakerët arritën të transferonin fondet nga portofolat digjitale që kompania përdor për përpunimin e transaksioneve.

Hetimi fillestar i kompanisë sugjeroi se sulmi mund të kishte nisur nga komprometimi i kompjuterit portativ të një punonjësi, por verifikimet e mëtejshme zbuluan edhe pikë të tjera të cenueshmërisë, për të cilat Binance nuk dha hollësi.

Sipas kompanisë amerikane të analizës së blockchain, TRM Labs, sulmuesit kishin arritur të komprometonin infrastrukturën që autorizon transaksionet, duke u mundësuar të jepnin urdhra për transferimin e fondeve nga portofolat e Binance drejt adresave të kontrolluara prej tyre.

Avokati Joshua Chu, i specializuar në çështjet e kriptomonedhave në Hong Kong, e shpjegoi mekanizmin me një krahasim: sulmuesit mund të mos kenë marrë çelësin e kasafortës, por të kenë marrë kontrollin e sistemit që urdhëron hapjen e saj.

Disa kompani amerikane të analizës së blockchain kanë identifikuar ngjashmëri ndërmjet këtij sulmi dhe operacioneve të mëparshme të lidhura me hakerë nga Koreja e Veriut.

TRM Labs deklaroi se kishte besim të lartë se pas sulmit qëndronte i njëjti grup i lidhur me vjedhjen prej 1.5 miliardë dollarësh nga platforma Bybit në vitin 2025, të cilën FBI ia kishte atribuuar hakerëve koreano-veriorë.

Edhe Chainalysis identifikoi lidhje mes fondeve të vjedhura nga Binance dhe aseteve të përfitur nga një sulm ndaj platformës Bitget një muaj më parë.

Megjithatë, bashkëdrejtuesi ekzekutiv i Binance, Richard Teng, deklaroi se hetimi i kompanisë nuk kishte arritur ende të identifikonte autorët.

Koreja e Veriut ka mohuar vazhdimisht përfshirjen në sulme kibernetike dhe vjedhje kriptomonedhash. Përfaqësuesit e saj në Gjenevë dhe Kinë nuk iu përgjigjën menjëherë kërkesave të Reuters për koment.

Një nga aspektet më të pazakonta të kësaj grabitjeje është se rreth gjysma e aseteve të vjedhura u bllokuan relativisht shpejt.

Një pjesë e konsiderueshme e fondeve përbëhej nga stablecoin, kriptomonedha të projektuar për të ruajtur një vlerë relativisht të qëndrueshme, zakonisht të lidhur me dollarin amerikan.

Ndryshe nga Bitcoin apo Ether, disa stablecoin mund të bllokohen nga kompanitë emetuese.

Tether, Circle, Ripple dhe World Liberty Financial, sipërmarrja e kriptomonedhave e lidhur me familjen Trump, ndërmorën veprime për ngrirjen e aseteve të identifikuara si pjesë e vjedhjes.

Megjithatë, ngrirja e fondeve nuk nënkon automatikisht kthimin e tyre te Binance. Ajo kufizon mundësinë e hakerëve për të transferuar ose përdorur.

TRM Labs vlerësoi se rreth 2.4 miliardë dollarë në Bitcoin dhe Ether mbeteshin jashtë mundësisë së bllokimit të drejtpërdrejtë nga emetuesit.

Disa prej fondeve të vjedhura ishin përdorur gjithashtu si kolateral për të marrë hua në Ether, duke e komplikuar më tej gjurmimin e tyre.

Ekspertët shpjegojnë se Bitcoin dhe Ether nuk kontrollohen nga një kompani e vetme që mund të vendosë ngrirjen e tyre. Fondet mund të ndalohen vetëm nëse kalojnë në një platformë që pranon të bllokojë ose nëse autoritetet arrijnë të sigurojnë çelësat private përkatës.

Pas transferimit fillestar, sulmuesit nisën të lëviznin me shpejtësi fondet për të nxjerrë jashtë kontrollit të kompanive dhe autoriteteve.

Ekspertët vlerësojnë se hakerët mund të përdorin përzierjen e fondeve të vjedhura me asete të tjera, shkëmbimin me kriptomonedha më pak të njohura ose transferimin përmes platformave të ndryshme për të vështirësuar identifikimin e origjinës së parave.

Bernardo Brites, drejtues i Trace Finance, shpjegoi për Reuters se orët e para pas një sulmi janë vendimtare për autorët.

Me kalimin e kohës, adresat e lidhura me fondet e vjedhura identifikohen dhe mund të futen në listat e zeza të platformave dhe ofruesve të shërbimeve të pagesave.