Zbulohet baza e drogës në pyjet e Komanit, sekuestrohen 56.7 kg kanabis

Në një operacion policor të koduar "Gjurmët", katër persona janë arrestuar dhe një tjetër po hetohet në gjendje të lirë për transportimin e drogës në zonën e Komanit. Sekuestrohen 56.7 kg kanabis. Shtetasit, të moshave 33 deri në 67 vjeç, dyshohen se bashkëpunonin për transportimin e drogës me automjete dhe varka drejt zonës së Komanit, ku e fshihnin dhe e pergatitnin për shitje. Gjatë kontrollit në një ambient të përshtatur për kamping dhe në automjete, u gjetën 10 thasë me kanabis, të cilët u sekuestruan si prova materiale. Hetimet vijojnë për dokumentimin e plotë të aktivitetit të dyshuar kriminal, ndërsa materialet procedurale i janë referuar Prokurorisë për veprime të mëtejshme.