FBI heton vjedhjen e 6.3 miliardë dollarëve, dyshimet çojnë drejt Koresë së Veriut

Byroja Federale e Hetimit (FBI) ka konfirmuar se po shqyrton sulmin kibernetik ndaj platformës Binance, gjatë të cilit hakerët dyshohet se kanë marrë kriptomonedha me vlerë rreth 6.3 miliardë dollarë. Autoritetet amerikane po bashkëpunon me platformën më të madhe të tregtimit të kriptomonedhave për të hetuar një nga vjedhjet më të mëdha digjitale në histori. Ekspertët e sigurisë kibernetike dyshojnë se pas sulmit qëndron një grup hakerësh i lidhur me Korenë e Veriut.

Sipas britanikes The Guardian, FBI-ja po bashkëpunon me institucione publike dhe kompani private për të percaktuar përmasat e incidentit, pasojat e mundshme dhe hapat e mëtejshëm të hetimores. Binance po bashkëpunon gjithashtu me Shërbimin Sekret amerikan dhe autoritetet të tjera ndërkombëtare për të identifikuar autorët dhe për të rikuperuar fondet.

Kompanitë amerikane të analizës së teknologjisë blockchain, TRM Labs dhe Chainalysis, ia atribuojnë sulmin grupit TraderTraitor, të cilin ekspertët e lidhin me Korenë e Veriut. Megjithatë, autoritetet nuk kanë publikuar ende një përfundim zyrtar për pergjegjësinë e sulmit.

Hetimet paraprake të Binance sugjerojnë se autorët mund të kenë depërtuar në sistemet e kompanisë përmes kompjuterit të komprometuar të një inxhinieri. Ky akses dyshohet se u ka mundësuar të kryejnë transaksione të paautorizuara dhe të transferojnë fonde nga portofollet digjitale të platformës.

Binance ka deklaruar se nuk ka gjetur prova që çelësat private të portofollet digjitale të jenë ekspozuar. Kompania njoftoi se, në bashkëpunim me partnerët e industrisë, ka arritur të bllokojë rreth 3 miliardë dollarë nga asetet e prekurë. Ajo ka premtuar gjithashtu se do të mbulojë humbjet e konfirmuara të klientëve me fondet e saj.

Ndërkohë, Chainalysis ka identifikuar metoda të pazakontë për transferimin dhe fshehjen e origjinës së fondeve. Sipas kompanisë, autorët kanë realizuar mijëra transaksione brenda një periudhe të shkurtër, duke përdorur mekanizma të automatizuar për të vështirësuar gjurmimin.

Incidenti ka ndikuar edhe në tregjet financiare. Bitcoin ka regjistruar rënje, ndërsa aksionet e kompanive të lidhura me industrinë e kriptomonedhave, përfshirë Coinbase dhe Strategy, kanë pësuar humbje të konsiderueshme në bursën amerikane.

Autoritetet rregullatore britanike po monitorojnë zhvillimet për të vlerësuar nëse incidenti mund të ketë pasoja të mëdha për sistemin financiar. Megjithëse përmasat e sulmit janë të konsiderueshme, disa analistë financiarë vlerësojnë se incidenti nuk përben aktualisht një rrezik të rendësishëm për aftësinë paguese të Binance.

Rasti ka rikthyer vëmendjen te siguria e platformave të centralizuara të kriptomonedhave, mbrojtja e fondeve të investitorëve dhe nevoja për bashkëpunim ndërkombëtar kundër krimit kibernetik.