"Lista e zezë" e protestuesve: Ekspertët e kundërshtojnë vendimin e qeverisë shqiptare
Ekspertët juridikë kundërshtojnë vendimin e qeverisë shqiptare që i jep Policisë shtetërore kompetencë për të kufizuar daljen jashtë vendit të personave të dyshuar për përfshirje në akte dhune gjatë protestave.
Vendimi i Këshillit të Ministrave, i miratuar javën e kaluar me propozim të Ministrisë së Brendshme dhe i firmosur nga kryeministri Edi Rama, parashikon krijimin e një regjistri të posaçëm elektronik për personat e referuar nga Policia e Shtetit në prokurori për vepra penale kundër autoritetit shtetëror, rendit dhe sigurisë publike. Regjistri do të administrohet nga Drejtoria e Përgjithshme e Policisë shtetërore dhe do të përmbajë të dhëna personale dhe procedurale për personat e identifikuar në materialet e referuara në prokurori.
Ekspertët juridikë kundërshtojnë vendimin, duke cilësuar mekanizmin në kundërshtim me Kushtetutën dhe Kodin e Procedurës Penale. Avokati Julian Mërtiri tha se vendimi do të ketë pasoja të rënda për njerëzit dhe se mungon kontrolli gjyqësor. "Nëse zbatohet, do të ketë pasoja të rënda për njerëzit, shumë të rënda, pasi mungon kontrolli gjyqësor", tha Mërtiri.
Vendimi parashikon gjithashtu që autoritetet shqiptare të njoftojnë shtetet e huaja për personat e regjistruar, edhe kur atyre u lejohet të udhëtojnë. Dispozita më e debatueshme lidhet me kufizimin e daljes nga territori shqiptar. Pika 5 e vendimit përcakton se, kur verifikimet individuale evidentojnë të dhëna për një person në këtë regjistër, "edhe nëse ndaj personit nuk është vendosur masa e sigurimit për ndalimin e largimit jashtë shtetit, Policia Kufitare ka të drejtën e refuzimit administrativ të daljes".
Ekspertët kundërshtojnë bazën ligjore për të mbështetur kompetencën e Policisë Kufitare për të refuzuar daljen nga vendi pa vendim gjykate. Avokati Gentian Serjani argumenton se qeveria i ka dhënë kësaj dispozite një interpretim që nuk përputhet me qëllimin dhe përmbajtjen e ligjit. "Mënyra se si është hartuar dhe referuar ligji për kontrollin e kufirit shtetëror nuk qëndron, sepse ligji e përcakton qartazi që flet për ata persona të cilët po i shmangen ndjekjes penale, kanë urdhër për t'u ndaluar, ose ka një vendim gjyqësor për t'u arrestuar", shpjegoi Serjani.