Prokuroria Speciale intervistoi Kryetarin e Prishtinës për shpërdorim detyre

Prokuroria Speciale e Kosovës tha se Kryetari i Prishtinës, Përrim Rama, është intervistuar të premten, 30 tetor, në cilësinë e të pandehurit dhe dyshohet për veprim penal "Keqpërdorim i pozitës apo autoritetit zyrtar". Në një komunikat, Prokuroria Speciale tha se është duke i ndërmarrë veprimet e nevojshme hetimore dhe procedurale në përpunje me ligjin në fuqi. Rama u paraqit para Prokurorisë Speciale për intervistim rreth orës 13:30. Pas intervistimit, ai tha se është i gatshëm të bashkëpunojë me Prokurorinë Speciale për këto çështje dhe prandaj edhe u paraqit në Prokurori, duke theksuar se "jemi totalisht transparentë". "Puna ime është zhvillimi i kryeqytetit, ndërtimi i kryeqytetit, puna e Prokurorisë është të dije që çdo gjë po bëhet në bazë të legjislacionit", u shpreh i pari i Prishtinës. Avokati i tij, Artan Qerkini, tha për mediat se Rama është i gatshëm të japë sqarimet e nevojshme para organit ndjekës, në mënyrë që Prokuroria "të bindet se çdo gjë në lidhje me këto projekt ka shkuar sipas ligjit". Shërbimi i Arkitektit të Kryeqytetit është themeluar më 2022 nga Komuna e Prishtinës gjatë mandatit të Ramës, që parasheh hartimin e projekteve arkitekturore, urbanistike dhe infrastrukturore për Prishtinën. Komuna kishte hapur një tender të quajtur "Konsulencë për themelimin e Shërbimit të Arkitektit të Kryeqytetit", me vlerë të parashikuar prej 12 milionë eurosh. Ky projekt ishte kritikuar nga opozita e kryeqytetit dhe nga organizatat joqeveritare që kishin argumentuar se kishte pasur shkelje. Më 2024, organizata joqeveritare Demokraci Plus kishte kërkuar nga Komuna e Prishtinës që të anulonte kontratën 12 milionëshe. Kjo organizatë kishte thënë se ishin bërë shkelje gjatë caktimit të komisionit vlerësues të ofertave, pasi në të ishte caktuar një person, që nuk ishte pjesë e Komunës së Prishtinës. Sipas organizatës, ka dyshime për konflikt interes pasi, ky anëtar komisioni figuronte si bashkëpunëtor i një prej kompanive fituese, përkatësisht Anarch Sh.P.K. Operatori tjetër fitues ishte Ardi CC L.L.C. Teksa Rama po intervistohej nga Prokuroria Speciale, shefi i asambleve të Lëvizjes Vetëvendosje në Komunën e Prishtinës, Gëzim Sveçla, shkroi në rrjetet sociale se 1 milion e 48 mijë euro i kishte paguar Komuna e Prishtinës për shërbimet e ofruara nga Arkitekti i Kryeqytetit për tetor-nëntor 2023. Ai tha se pagesa ishte bërë për konsulencë. Ai tha se LVV-ja e kishte denoncuar qysh në fillim Shërbimin e Arkitektit të kryeqytetit.