Marash Kumbulla, një debutim shkëlqyer në Kupën e Mbretit dhe një sfidë për trajnerin e Rayo Vallecano

Marash Kumbulla ka dhënë sinjale të forta në paraqitjen e tij të parë me fanellën e Rayo Vallecano. Mbrojtësi i kombëtares shqiptare ka shkëlqyer në debutimin ndaj Recreativo Huelva, duke i dhënë trajnerit Beñat San José një dilemë të re për formacionin titullar.

Në një ndeshje që Rayo e fitoi me rezultatin 3-2 pas kohës shtesë, më 27 tetor, Kumbulla tregoi se është një alternativë serioze për një vend në qendër të mbrojtjes. Ndonëse ishte i fundit ndër përforcimet e verës që debutoi, shqiptari la menjëherë gjurmë me paraqitjen e tij.

Kumbulla qëndroi në fushë për 80 minuta, duke u dalluar si në fazën mbrojtëse, ashtu edhe në ndërtimin e aksioneve sulmuese. Në stadiumin “Nuevo Colombino”, ai regjistroi pesë kontribute difensive dhe fitoi pesë duelët e zhvilluar (5/5).

Por kontributi i tij nuk u kufizua vetëm në mbrojtje. Në një aksion për të larguar topin nga zona e rrezikut, Kumbulla u bë pjesë e një kundërsulmi dhe arriti të fitojë një penallti, të cilën Alemao e shndërroi në gol për barazimin e përkohshëm 1-1.

Pas përfundimit të takimit, mbrojtësi kuqezi nuk e fshehu kënaqësinë për fitoren dhe u shpreh i gatshëm të japë maksimumin sa herë që trajneri do të këtë nevojë për të.

“Jam shumë i lumtur për fitoren. Ishte shumë e rëndësishme që të kalonim në raundin tjetër. Ndihem shumë mirë fizikisht dhe dua të jap gjithçka për të arritur objektivat tonë, sepse tifozët tanë e meritojnë. Jam plotësisht në dispozicion të trajnerit dhe, kur ai të këtë nevojë për mua, do të jem i përgatitur”, deklaroi Kumbulla.

Kjo paraqitje pritet të rrisë ndjeshëm konkurrencën për dy vendet në qendër të mbrojtjes së Rayo Vallecano. Deri më tani, trajneri Beñat San José dukej se kishte percaktuar dyshen titullare me Lejeune dhe Mujaid.

Sezonin e kaluar, dyshja më e përdorur në qendër të prapavijës ishte Lejeune dhe Pathé Ciss. Megjithatë, me afrimin e Mujaid dhe Kumbullës, tekniku vendosi ta rikthente senegalezin në pozicionin e tij natyral, duke i besuar qendrën e mbrojtjes Mujaid.

Tashmë, pas debutimit bindës të shqiptarit dhe paraqitjeve pozitive të Pelayo, zgjedhjet për trajnerin janë shtuar. Kumbulla ka trokitur fort në derën e formacionit titullar dhe Beñat San José do të ketë gjithnjë e më të vështirë të vendosë se kush duhet të luajë në qendër të mbrojtjes.