Incident diplomatik në G20: Evropianët refuzojnë fotografinë me Lavrov

Një incident diplomatik shpërtheu në Atlanta gjatë takimit të ministrave të Jashtëm të G20-s, pasi disa ministra evropianë refuzuan të merrnin pjesë në fotografinë me ministrin e Jashtëm rus, Sergej Lavrov. Sekretari amerikan i Shtetit, Marco Rubio, vendosi të anulonte fotografinë tradicionale për të shmangur një përplasje që mund të largonte vëmendjen nga diskutimet e takimit.

Ministri i Jashtëm gjerman, Johann Wadephul, deklaroi përpara nisjes së punimeve se përfaqësuesit evropianë nuk do të pozonin së bashku me homologun rus. "Nuk mund të flasim për normalitet në marrëdhëniet me Rusinë", theksoi Wadephul, duke shtuar se palët duhet të diskutojnë mosmarrëveshjet në tryezën e bisedimeve, pa krijuar përshpirtjen se marrëdhëniet janë normalizuar.

Edhe ministri i Jashtëm polak, Radosław Sikorski, mbështeti vendimin amerikan për anulimin e fotografisë. "Mendoj se organizatorët morën vendimin e duhur. Nuk jam i vetmi që nuk deshiroj të fotografohem me Lavrovin", deklaroi ai.

Pavarësisht mosmarrëveshjes, Lavrov mori pjesë në takimin e G20-s, ndërsa ministrat vijuan diskutimet sipas programit. Takimi dyditor, me 30 dhe 31 tetor, trajton luftën në Ukrainë, zhvillimet në Lindjen e Mesme, sigurinë energjetike, tregtinë ndërkombëtare dhe tensionet që ndikojnë në ekonominë globale.