Ulja e TVSH-së për ushqimet, një kërkesë e përsëritur nga prodhuesit dhe importuesit

Ulja e TVSH-së për produktet e shportës ushqimore është një kërkesë e përsëritur nga prodhuesit dhe importuesit, por a do të ketë efekt? Ulja e TVSH-së është vlerësuar si një masë pozitive nga kontabilisti Sotiraq Dhamo, por ai thekson se ulja e tatimit nuk do të thotë se çmimet do të ulen automatikisht në të njëjtin masë.

Sipas relacionit të projektligjit, zbatimi i kësaj mase pret të reduktojë të ardhurat buxhetore me 12,8 miliardë lekësh. Ndërkohë, rritja e normave standarde të TVSH-së nga 20% në 21% synon të kompensojë një pjesë të efektit negativ në të ardhurat buxhetore që vjen nga aplikimi i normave të reduktuara për produktet ushqimore.

Sipas përllogaritjeve të paraqitura në relacionet përkatëse, kombinimi i këtyre dy masave, së bashku me rritjen e TVSH-së për turizmin nga 6% në 10%, pret të ketë një efekt neto pozitiv prej rreth 1,6 miliardë lekësh në buxhet.

Megjithatë, kontabilisti Sotiraq Dhamo thekson se ulja e TVSH-së nuk do të thotë se çmimet do të ulen automatikisht në të njëjtin masë. Ai argumenton se ndryshimi i normave tatimore duhet të shoqërohet me një analizë të plotë të kostove të bizneseve që ndikojnë në formimin e çmimeve.

"Ulja e TVSH-së për mallrat e shportës në 6% është një masë në drejtimin e duhur dhe mund të duhet të ishte ndërmarrë edhe më parë. Në fakt, më shumë sesa bizneset, këtë kërkesë e kanë bërë qytetarët dhe forcat politike.

Megjithatë, përvojat e vendeve të tjera, por edhe të Shqipërisë, si dhe studimet e kryera nga studiues vendas dhe të huaj, kanë evidentuar se ulja e normave të taksave indirekte, siç është TVSH-ja, nuk reflektohet në uljen e çmimeve në të njëjtin masë me reduktimin e normave tatimore.

Pra, nëse TVSH-ja për mallrat e shportës ulet nga 20% në 6%, kjo nuk do të thotë se çmimet e këtyre mallrave do të ulen me 14%."