Grabitja më e madhe në historinë e kriptomonedhave

Platforma më e madhe në botë për kriptomonedha, Binance, është goditur nga një sulm masiv kibernetik, duke rezultuar në humbje të rreth 6.3 miliardë dollarësh në asete digjitale. Kjo konsiderohet një nga vjedhjet më të mëdha në historinë e tregut të kriptomonedhave.

Sipas Binance, sulmuesit arritën të zbrazin disa kuletë digjitale që platforma përdor për përpunimin e transaksioneve. Fillimisht, kompania dyshoi se sulmi kishte ardhur si pasojë e komprometimit të një laptopi, por hetimet e mëtejshme zbuluan edhe pika të tjera të cenueshme në sistemet e saj.

Sipas kompanisë amerikane të analizës së blockchain-it, TRM Labs, hakerat arritën të komprometonin infrastrukturën që autorizon nënshkrimin e transaksioneve, duke u munduar kështu të leshojnë urdhra për transferimin e fondeve nga kuletat e prekura.

Pjesa më e madhe e vjedhjes u realizua brenda vetëm 20 minutash. Pas transferimit të fondeve, sulmuesit tentuan t'i zhvendosnin ato sa më shpejt, para se platformat dhe emetuesit e monedhave digjitale të ndërhyjnë për t'i bllokuar.

Bashkëdrejtori ekzekutiv i Binance, Richard Teng, deklaroi se humbjet do të mbulohen përmes fondit të sigurisë së përdoruesve të kompanisë dhe burimeve të saj financiare. Ky fond përmban një rezervë prej 1 miliard dollarësh në Bitcoin, e krijuar për të mbrojtur klientët në rast incidentesh të tillë.

Disa kompani amerikane të analizës së blockchain-it kanë vënë në dukje ngjashmëri mes këtij sulmi dhe operacioneve të mëparshme që u janë atribuuar grupeve të hakerave nga Koreja e Veriut. TRM Labs vlerëson me nivel të lartë besueshmëri se pas sulmit mund të qëndrojë i njëjti grup që dyshohet për sulmin ndaj platformës Bybit vitin e kaluar, të cilin FBI-ja ia atribuoi hakerave koreano-veriorë.

Megjithatë, Richard Teng deklaroi se hetimet e Binance nuk kanë identifikuar ende autorët e sulmit. Ndërkohë, kompania Chainalysis bëri të ditur se fonde nga një sulm i muajit të kaluar ndaj platformës Bitget po përzieren me paratë e vjedhura nga Binance.

Ngjarja vjen në një periudhë kur sektori i kriptomonedhave është përballuar me një sërë sulmesh të mëdha kibernetike. Sipas të dhënave të TRM Labs, gjatë vitit të kaluar u vjedhën rreth 2.9 miliardë dollarë në kriptomonedha, në afro 150 incidente të ndryshme.

Sulmi ndaj Binance ka shtuar shqetësimet për sigurinë e platformave të aseteve digjitale. Pas lajmit, çmime të kriptomonedhave pësuan rënje, ndërsa vlera totale e tregut të stablecoin-eve u zvogëlua, duke sinjalizuar tërheqje të mundshme të investitorëve nga tregu. Hetimet vijojnë për të identifikuar autorët dhe për të përcaktuar se sa nga fondet e vjedhura mund të rikuperohen.